Jaqsylyqqa jany qumar ánshi Zattybek Kópbosynuly záýlim úıiniń qasyndaǵy dúkenin aýyldastaryna namazhana retinde syıǵa berdi. Endi aýyldastary bul dúkenge taýar alý úshin emes, namaz oqý úshin keletin bolady, - dep habarlaıdy Qamshy.kz Oıshoǵyrǵa silteme jasap.

QMDB OQO ókil ımamy Ahmetjan Kerimbek alǵashqylardyń biri bolyp namazhanada namaz oqyp, ıgi iske razylyǵyn bildirip alǵysyn aıtty. Imam namazhanaǵa arnaıy ustaz bekitip berdi. Endi bul namazhanada aýyl balalary quran oqyp, ımandylyqpen sýsyndaıtyn bolady. Ata-anany syılaý, otandy súıý, kórkem minez taqyrybynda turaqty túrde sabaqtar ótip turady.

Jumys istep, saýdasy qyzyp turǵan dúkendi namazhanaǵa aınaldyrǵanyn Zattybek Kópbosynuly: « Alla maǵan óner berdi, sol óner arqyly rızyǵymdy molaıtty. Eki qabatty záýlim úı saldym. Bul namazhana meniń Allaǵa degen shúkirligim. Bizdiń móltek aýdanǵa meshit sál alystaý. Jaıaý júrip bir saǵatta barasyń. Osyndaǵy aqsaqaldar, balalar qınalyp qalmasynshy, jınalyp namaz oqıtyn, rýhanı áńgime aıtatyn jeri bolsynshy degen nıet edi. Arnaıy ustaz bekitildi. Endi balalar osy namazhanadan babalar ustanǵan asyl dinniń negizderin úırenip, ımandy bolyp ósse men úshin sol úlken baqyt. Osy ýaqytqa deıin de dúkensiz ómir súrdim ǵoı, budan keıin de Alla ózi jetkizedi» — deıdi.

Aqsaqaldar aq batasyn berip, kórshiler: «Jany jaısań, qoly ashyq Zattybek Kópbosynulynyń bul isi naǵyz azamattyq, tulǵalyq. Aman júrsin, ómirili berekeli bolsyn» — dep aq tilegin aıtyp, rızashylyqtaryn bildirdi.

El bolashaǵynyń baıandylyǵyna sózben emes ispen atsalysyp júrgen Zattybek Kópbosynulydaı azamattar kóp bolsyn!