Qarý-jaraqty qoljetimdi jerge qoıǵan «Pallada» dúkeniniń ıesi qylmystyq jaýapqa tartylady. 5 maýsym kúni lańkester shabýyl jasaǵan «Pantera» men «Pallada» qarý-jaraq dúkenderiniń ıeleri oqıǵadan keıin 20 AEK ákimshilik aıyppul tólep, barlyq kemshilikti joıdy, - dep habarlaıdy Qamshy.kz Bnews.kz - ke silteme jasap.

«Oblystaǵy barlyq qarý-jaraq dúkenderi oblystyq prokýratýra, oblystyq İİD, İshki ister mınıstrliginiń tekserýinen ótti. «Pantera» dúkeninde qarý-jaraqty saqtaý kemshilikteri anyqtaldy. Dúken ıesine 40 myń teńge ákimshilik aıyppul salyndy. Al «Pallada» dúkeniniń ıesi qarý-jaraqtyń qaýipsizdigin qamtamasyz etpegen. Dúken ishine kirgen adam qarýǵa ońaı qol jetkizgen. Shúrippeleri bekitilmegen. Sondyqtan qylmystyq is tergelip jatyr», - deıdi oblystyq prokýratýranyń İİ basqarmasynyń basshysy Maratbek Myrzamuratov.

Aıta keteıik, eki qarý-jaraq dúkeni de qarý-jaraqty saqtaý, qaýipsizdikti qamtamasyz etý kemshilikterin joıyp, aıyppul tóledi.

«5 maýsym kúni bolǵan lańkestik oqıǵa áli tergelip jatyr. Sondyqtan is týraly qandaı da bir aqparat berýge bolmaıdy. Qazir 67 materıal bar. Birneshe prokýror tergeý jumystaryna qatysyp júr. Kináliler men olarǵa kómekteskenderdiń barlyǵy ustaldy»,- deıdi Basqarma basshysy.