«Gvardeısk» áskerı polıgonynda tótenshe jaǵdaı oryn aldy. Armıa halyqaralyq oıyndaryna daıyndyq aıasynda ótken jattyǵý sabaqtary kezinde 120 mm mınomet jarylyp, Angola komandasynyń áskerıleri zardap shekti, - dep habarlaıdy Qamshy.kz BNews.kz - ke silteme jasap.

Saldarynan bir áskerı qyzmetshi aýyr hálde jatyr, birneshe áskerı qyzmetshi jeńil jaraqat aldy. Zardap shekkender Otar áskerı bazasynyń jeke medısınalyq jasaǵyna jetkizildi. Aldyn ala tergeý boıynsha, Angola komandasy 2B11 mınometinen oq atý kezinde qaýipsizdik sharalaryn saqtamaǵan. Kelisimsiz okoptan shyǵyp, atý pozısıasynyń ornyn aýystyrǵan. Bul óreskel qatelik bolyp sanalady. Sondaı-aq, snarádtyń jarylýyna eki márte oqtaý da sebep bolýy múmkin.

QR Qorǵanys mınıstri Imanǵalı Tasmaǵambetovtiń buıryǵymen Qorǵanys mınıstriniń orynbasary general-leıtenant Oqas Saparovtyń jetekshilik etýimen komısıa quryldy. Ol jaǵdaıdy anyqtap,keshendi tekseris júrgizý úshin oqıǵa ornyna ushyp shyqty.

«Munyń aldynda bas tóreshi – «Artılerıalyq oq atý sheberleri» baıqaýynyń jetekshisi general-maıor Lut Álshekenov 13 eldiń komandasyna tehnıka qaýipsizdigi boıynsha nusqaý ótkizgenin aıta ketý qajet. Qatysýshylar tek atalǵan prosedýradan keıin ǵana jattyǵýǵa  kiristi», - dep málimdedi QR Qorǵanys mınıstrliginiń baspasóz qyzmetinen.