Ózbekstannyń Ferǵana oblysy Rıshtan aýdanynda 26 jastaǵy áıel azamattyq kúıeýi ulyn moıyndamaı, alıment tóleýden bas tartqan soń, 11 aılyq sábıin Úlken Ferǵana kanalyna aǵyzyp jibergen. Sábıdiń denesin eki kúnnen soń kórshi aýyldyń fermeri taýyp alǵan, - dep habarlaıdy Qamshy.kz centralasian.org – ke silteme jasap.

Ferǵana oblysynda quqyq qorǵaý salasynda jumys isteıtin derekkóz áıeldiń eki ret turmys qurǵanyn aıtady. «Ol jeńil júristi kelinshek. D.P. degen azamatpen turdy. Keıin ajyrasqannan keıin, ony sotqa berip, balasyna alıment óndirip almaq boldy. Alaıda, sotta D.P. bala ózinen emes ekenin aıtty. Áıel alıment óndirip ala-almaǵandyqtan, ashýmen balany sýǵa laqtyryp jibergen. Aldymen ulyn laqtyrǵan. Sosyn ózi de sekirmek bolǵan, biraq sońynda qorqyp qalǵan, – deıdi ol.

– Balanyń denesi fermerdiń jerine deıin aǵyp barǵan. Sosyn ol birden mılısıaǵa habarlady, – deıdi quqyq qorǵaý organdaryndaǵy aqparat kózi.

Alaıda ekinshi bir derekkóz balasyn sýǵa laqtyrǵan áıel jeńil júristi bolmaǵan deıdi. Onyń qarjylyq qıyndyqtan psıhologıalyq stresske túskenin aıtady.

Qazirgi ýaqytta áıel qamaýda, onyń ústinen Qylmystyq kodekstiń 97-baby boıynsha («Qastandyqpen kisi óltirý») qylmystyq is qozǵalǵan.