Segiz adamnan quralǵan ekspedısıa Alash kósemi Álıhan Bókeıhannyń izimen júrip, elge qaıta oraldy. Álıhannyń týǵan jeri Aqtoǵaıdan bastalǵan sapar Qarqaraly men Semeıge, odan ary Omby, Samara, Orynbor, Mınsk, Máskeý jáne Sankt-Peterbýrg qalalaryna jalǵasqan bolatyn. Bas aıaǵy 17 kúnge jetken sapardy Qazaq geografıalyq qoǵamy uıymdastyrǵan, - dep habarlaıdy Qamshy.kz 31 arnaǵa silteme jasap.
Álıhannyń kindik qany tamǵan Qyzylaraıdan, ata-babasynyń zıraty jatqan Taldybeıitten bastalǵan ekspedısıa tún qarańǵysyna qaraı Qarqaraly arqyly Semeıge jol tartýmen jalǵasty. Alashordanyń ortalyǵy bolǵan Semeıden soń Omby. Ár qalada, onyń tarıhı ǵımarattarynda Álıhannyń izi jatyr. Ekspedısıa Alash kóseminiń, ult-azattyq kóteriliske qatysty dúnıeniń bárin ózderi de tanyp, elge de nasıhattaýdy maqsat tutqan. Osy saparda zertteýshiler Álıhannyń qyzy Elızavetanyń Máskeýdegi Novodevıche zıratynda jatqanyn tuńǵysh ret anyqtaǵan.
- Kózi tirisinde,ákesiniń aqtalǵanyn kútip kórmeı ketken. Sol kisige Quran oqyǵynymyz ekpedısıa múshesi úshin úlken jańalyq boldy desek bolady, - deıdi profesor Aıgúl İsimaqova.
Ekspedısıaǵa profesor Aıgúl İsimaqova bas bolyp, Qaıyrbek Kemeńger, Aıjan Hamıt sıaqty azamattar yntaly toptyń quramyn kúsheıte túsken. Ekspedısıa tyl jumystary kezinde Álıhannyń Mınskige barǵan kezinde turaqtaǵan Lój atty qonaqúıdi de qıyndyqpen tapqan.
- Ol gostınısanyń ornynda búginde ulttyq bank ǵımaraty salynǵanyn anyqtap ózderi sondaı resmı túrde bizdiń elshiliktiń qyzmetkeri arqyly jiberip, Táýelsizdik pen Lenın kóshesinde ornalasqanyn ózderi de bizben birge anyqtady. Nemister salǵan ǵımarat bolyp shyqty, - deıdi profesor Aıgúl İsimaqova.
Ár qaladaǵy Álıhanǵa, Alashqa qatysty tarıhı oryndardy kórip kelgen ekspedısıa músheleri Máskeýdiń Don zıratyndaǵy Álıhan Bókeıhan jerlengen jerge Taldybeıittiń bir ýys topyraǵyn jetkizip, rýhyna Quran baǵyshtady.
Ekspedısıaǵa qatysqandardyń aıtýynsha, Qaraǵandy, Orynbor syndy qalalarda Álıhanǵa arnalǵan ne bir kóshe, ne bir memorıal taqta joq. Sondyqtan, ekspedısıa músheleri osyndaı da olqylyqtardyń ornyn toltyrý kerektigin aıtady.
