Qazaqstannyń Mańǵystaý oblysyndaǵy «Burǵylaý» munaı servıstik kompanıasynyń júzdegen jumysshysy búgin tańerteń jumysqa shyǵýdan bas tartyp, kásiporyn basshylyǵyna talap qoıdy. Jumysshylar men kásiporyn basshylarynyń, sondaı-aq jergilikti bılik ókilderiniń kelissózderinde aıqaı kóp boldy, - dep habarlaıdy Qamshy.kz centralasian.org-ke silteme jasap.

Burǵylaý qurylǵylary ornalasqan aımaqqa barýlary kerek bolǵan júzdegen vahtashy Jańaózendegi avtobýs beketiniń mańyna jınalyp, jalaqy men jumys ýaqytynyń qysqartylýyna narazylyqtaryn bildirdi. Jınalǵandardyń aıtýlarynsha, jumys berýshi daǵdarystyń saldarynan aqsha jetispeıdi degendi alǵa tartyp keledi, biraq burǵylaý qondyrǵylaryndaǵy jumys jospary kúndelikti oryndalyp otyr.

Buǵan qosa, vahtashylar kompanıa basshylyǵynyń ujym atynan sóıleıtin belsendilerdi qýdalap, jumystan shyǵarǵanyn málimdedi. Soǵan baılanysty olar «Burǵylaý» kompanıasynyń bas dırektory Asqat Sarıevtiń jumystan ketýin talap etti. «Saǵatty qysqartyp tastady. Kásiporynda 2200 adam isteıdi. Jarty jylda 66 adamdy jumystan shyǵardy», - dedi munaı operatorynyń kómekshisi Aqylbek Nurlybaev.

Jınalǵandar mekeme kásipodaǵyna senimsizdik bildirip, kásipodaq jetekshiligine ózderi saılap alǵan Sádýaqas Bekqalıevtiń jumys isteýine kedergi keltirmeýlerin talap etti. Bekqalıevtiń ózi búgingi jıynda bolǵan joq. Jumysshylardyń aıtýlarynsha, ony polısıaǵa tergeýge alyp ketken. Jumysshylar narazylyqtyń tórt kún buryn bastalǵanyn málimdedi, biraq qalaǵa BAQ ókilderi kelmeıinshe, kásiporyn basshylyǵy men jergilikti bılik ókilderi olardyń talaptaryna qulaq aspaı kelgen.

Jumysshylarmen kezdesýge kelgen «Burǵylaý» kompanıasynyń bas dırektory Asqat Sarıev kásiporynda belsendilerdi qýdalaıdy degen aıyptaýlardy joqqa shyǵardy.

Eskertý: Vıdeoda beıádep sózder aıtylady.

Foto, vıdeomaterıaldar Azattyq saıtynan alyndy.