27 shildede Halyqaralyq aýyr atletıka federasıasy (IWF) 2008 jáne 2012 jyldary ótken Olımpıadalarda alynǵan dopıng-synamalary qaıta tekserýdiń ekinshi kezeńiniń qorytyndylary boıynsha oń nátıje kórsetken birqatar sportshylardy jarıa etti. Solardyń qatarynda London Olımpıadasynda 94 kelige deıin salmaqta óner kórsetken tórt ziltemirshi bar, - dep habarlaıdy Qamshy.kz arhar.kz – ke silteme jasap.

Olar: qazaqstandyq Almas Óteshov (jetinshi oryn), ázirbaıjandyq Intıgam Zaırov (altynshy oryn), reseılik Aleksandr Demanov (tórtinshi oryn) pen Aleksandr Ivanov (ekinshi oryn).

London Olımpıadasynyń chempıony, qazaqstandyq Ilá Ilınniń dopıng-synasy da qaıta tekserýden soń oń nátıje kórsetti. Demek, úzdik shyqqan jeti sportshynyń beseýinde dopıng-synama oń nátıje kórsetkendikten, London oıyndarynyń altyn medali úshinshi oryndy ıelengen moldovalyq Anatolıı Kyrykýǵa buıyrady.

«Kúmis» sol kezde besinshi bolǵan ırandyq Saed Mohammadpýrǵa, «qola» segizinshi orynǵa taban tiregen koreıalyq Kım Mın Djege beriledi. Aıta keteıik, qazirgi tańda Kyryký sporttan segiz jylǵa shettetildi. Ol 2015 jylǵy Eýropa chempıonatynynyń qorytyndylary boıynsha dopıngpen ustaldy. Onyń qanynan metenolon tabyldy. Alaıda ol London Olımpıadasynda resmı túrde taza boldy.

Aýyr atletıkadan Qazaqstan quramasy Rıo Olımpıadasyna segiz sportshymen attanady. Olar: Arlı Chonteı (56 kelige deıin), Farhad Harkı (62 kelige deıin), Nıjat Rahımov (77 kelige deıin), Denıs Ýlanov (85 kelige deıin) jáne Aleksandr Zaıchıkov (105 kelige deıin), sondaı-aq Margarıta Elıseeva (48 kelige deıin), Karına Gorıcheva (63 kelige deıin) jáne Jazıra Japparqul (69 kelige deıin). Osydan birer kún buryn ǵana elimizdiń boks quramasy da attanyp ketti.