Qazaqstan úkimeti Rıo-de-Janeıroda ótetin Olımpıada oıyndarynyń chempıondary men júldegerlerine 5 myńnan 250 myń AQSH dollaryna deıin qarajat tólemek, - dep habarlaıdy Qamshy.kz.

Bul týraly Mádenıet jáne sport mınıstrligi Sport isteri jáne dene tárbıesi  komıtetiniń baspasóz hatshysy Baqytbek Hamıt málimdedi.

«Qazaqstan Respýblıkasynyń Jazǵy Olımpıada oıyndaryna qatysatyn qurama komandalary bapkerleri men músheleri Úkimet qaýlysyna saı birinshiden altynshy orynǵa deıin kótermelenedi. Birinshi orynǵa – 250 myń dollar, ekinshi orynǵa – 150 myń dollar, úshinshi orynǵa – 75 myń dollar, tórtinshi orynǵa – 30 myń dollar, besinshi orynǵa – 10 myń dollar, altynshy orynǵa – 5 myń dollar syıaqy beriledi», - deıdi ol.

Baqytbek Hamıttyń aıtýynsha, sportshylardy daıyndaǵan bapkerler de sonsha somada syıaqy alady.

Esterińizge salsaq, Rıo-de-Janeıroda 5-21 tamyz aralyǵynda Jazǵy Olımpıada oıyndary ótedi. Oǵan Qazaqstannan 25 sport túri boıynsha 105 sportshy qatysady.