Qazaqtyń birtýar uly, Halyq qaharmany, keńes odaǵynyń batyry Toqtar Áýbákirov 70 jasqa toldy. Eńbek jolyn júk tasýshy bop bastap, batyr atanǵansha kórgen-bilgeni kitapqa júk bolǵan erin búgin eli ulyqtap jatyr. Álemdegi teńdesi joq 10 ushqyshtyń qataryna kiretin, ǵasyr adamy atanǵan batyr kindigi kesilgen Qarqaralyǵa keldi, - dep habarlaıdy Qamshy.kz KTK arnasyna silteme jasap.
Halyq batyry ushýdaǵy eń qıyn sát ushqysh bolýy úshin tapsyrǵan emtıhan kezindegi jaǵdaı deıdi. Qalǵany tek kúndelikti jumys. Kásibiniń jiligin shaǵyp maıyn ishkeni sonsha, Keńes úkimetindegi joıǵyshy bar, basqasy bar 50 ushaqty snyaqtan ótkizip berdi. Odaqta alǵashqy bolyp 1989 jyly MIG-29-ben kemege qonyp, qaıta ushyp ketken. Qazaqtyń qara nardaı jigiti joıǵysh ushaqpen esh aıaldamasyz soltústik polúske baryp kelgen alǵashqy ushqysh retinde de tarıhta qaldy. Keńes odaǵynyń batyry ataǵyn da osy úshin alǵan. Álemniń teńdessiz ushqyshy retinde esimi Vashıngtonda jazyldy.
Toqtar Áýbákirov, ǵaryshker, Halyq qaharmany:
-Meni sonaý qıyr shyǵysta eń úzdik ushqysh dep tanydy. Ol da jáı sebepten emes. Nege deseńizder men qazaqtyń atynan júrdim. Jalǵyz qazaq bolǵasyn ultymdy jaqsy qyrynan kórsetkim keldi.
Dese de, bala Toqtardyń kúni mamyrajaı bolǵan joq. Ákeden erte qalyp, eńkeıgen anasyn jetektep Temirtaýǵa kelgende, jasy tolmaǵandyqtan jumysqa tura almaı qınaldy. Óıtkeni 15-tegi kúáligi joq aýyl balasyn eshkim mańaılatpaǵan. Jumysqa julqynyp, eki kózi janyp turǵan bozbala aqyry kýálik beretin jerden qur qaıtpady.
Toqtar Áýbákirov, ǵaryshker, Halyq qaharmany:
-Men otyryp aldym. Kıetin kıimim jeıtin tamaǵym joq sender meni tamaqtandyrasyńdar dep. Sodan keıin men osy jerge shesheıdi alyp kele dedim. Men birinshi balany kórip turmyn jas kúnnen jumysqa barǵysy kep júrgen. Eı, jazyp berińder dedi.
Sodan Temirtaý metell quıý sehinde eńbek ete júrip alǵashynda parashútten sekirý, keıin ushqyshtar mektebine oqýǵa alyndy. Alǵyr, izdenimpaz, eńbeksúıgin jigit aqyry joıǵysh ushaqtardy taqymdaıtyn úzdik atandy. 1991 jyly ǵaryshkerlerdi daıyndaý tobyna qabyldanyp sol jyly kúzde qazaq pen ǵaryshty baılanystyrǵanyn el biledi. Bir ókinishtisi keńes úkimeti basshylyǵy ǵaryshqa ushqannyń bárine ustatatyn batyr ataǵyn oǵan qımaǵan. Týǵan eli 70 ke kelgendegi toıyn jasap, qarsy alǵan Qarqaralyda batyr aldymen ata-baba eskertkishine quran baǵyshtady. Sálden soń eliniń qoshemetine bólenip, qaýmalaǵan qarashanyń arasynda kórinbeı ketti.
Alash jurtynyń amanatyn arqalap, ǵaryshqa baryp kelgen batyrdyń toıyn týǵan ólkesi osylaı toılaýda. 100 ge tarta kıiz úı tigilip at jarysy men balýan kúrestirgen el máre-sáre. Óıtkeni táýelsizdik pen qazaq balasynyń jeti qat kókten asqanyna 25 jyl tolǵany el úshin aıtýly mereke bop tur.
