Astanada úsh jasar bala besinshi qabattaǵy páterdiń terezesinen qulap ketken. Biraq, háli nashar kúıde aýrýhanaǵa tústi. Bir ókinishtisi, Elordada terezedegi tordy jyrtyp, dalaǵa aýyp ketken ul-qyzdyń sany azaımaı otyr. Sóıtip masadan qorǵaıtyn tor bóbekterdiń ólimine ne múgedek bop qalýyna ákep soqtyrýda. Onyń ústine bıyl Astanada júzdegen bala bıikten qulap aýyr jaraqat alǵan. Al, dárigerler gıps salyp úlgermeı jatyr, - dep habarlaıdy Qamshy.kz KTK arnasyna silteme jasap.
Astananyń balalar aýrýhanasynda birneshe aıdan beri tynym joq. Búgin hırýrgter basy jarylyp, aýyr dene jaraqatymen túsken 3 jasar sábıdi aman qalyp alý úshin taǵy baryn salyp jatyr. Ol 5-shi qabattyń tereze jaqtaýynda oınap otyryp, tordan aýyp ketipti. Birneshe mınýttan soń kelgen anasy balasyn jerden qan-josa kúıinde taýyp alyp, eńirep jylaǵan.
Reanımasıadan shyqqan Álımusa da gıps salynǵan aıaǵyn aýyrsynyp jylap jatyr. Birden endi asqan ul ekinshi qabattyń terezesinen jerge qulaǵan. Perishtesi qaqqan bala, ajaldan aman qalyp qazir beti beri qarap keledi.
Aıdana Syrbaeva, Álımusanyń anasy:
-Biz ata-anasy jumysta boldyq. Balamyz ata-ájesiniń úıinde bolǵan, ekinshi qabatta. Ata–ájesi biz kelerde,saıajaıǵa ketip, 10 jasar inimizge qaldyryp ketken Musany. Ol terezeniń aldynda oınatyp turǵanda baıqaýsyzda tordan shyǵyp ketipti.
Tordan kelgen tajal úlkendi de, kishini de aıap jatqan joq. Onyń ústine jazǵy kanıkýl kezinde joǵarydan qulap , basy jarylyp qol-aıaqtary synǵandar aýrýhanaǵa syıar emes. Dabyl qaqqan aq halattylar kishkentaılaryn qaraýsyz qaldyratyn ata-analardyń jaýapsyzdyǵyna kúıinip otyr.
Halyq Kúlmanov, neırohırýrg:
-23- bala joǵary qabattardan qulap,jaraqattarymen tústi. Sonyń ishinde 2 bala qaıtyp ketti. Qalǵany bizdiń reanımasıa bólimshesinde.
Osyndaı oqıǵalar jazda kóbeıedi. Máselen, jaqynda Almatyda aıaqqa endi turǵan ul 12 qabatty úıdiń terezesinen qulap mert boldy. Biraq, jantúrshigerlik oqıǵalar ata-analarǵa sabaq bolar emes. Osylaısha, úlkender masadan qorǵanamyz dep júrgende, zardabyn kishkentaılar tartýda. Bul sumdyqtyń aldyn-alý úshin astanalyq dárigerler ákimdikke hat jazyp, úı salarda terezeniń myqtap bekitilýin suraǵan. Aq halattylar jazda ashyq turatyn terezedegi mundaı torlardy kishkentaı ul-qyzy bar otbasylardyń paıdalanbaýyn surap otyr.
