Bul suraqqa Almatyda jýrnalısermen kezdesken eldiń Qorǵanys mınıstri Imanǵalı Tasmaǵambetovtyń ózi jaýap berdi, - dep habarlaıdy Qamshy.kz 365info.kz-ke silteme jasap.

Esterińizge salsaq, shymkenttik «syra koroli» Toqtar Tóleshov qańtar aıynda qamaýǵa alynǵan bolatyn. Oǵan qylmystyq kodekstiń birqatar baptarymen qosa, «Bılikti kúshpen basyp almaq boldy» degen de aıyp taǵyldy. T. Tóleshovtiń sybaılastary retinde 6 maýsym kúni Ońtústik Qazaqstan oblysynda oryn tepken 35748, 55652 áskerı bólimderiniń komandırleri Bekzat Jýmın men Qaırat Pernebaev degen polkovnıkter de tutqyndalǵan edi.

Osy eki shendige qatysty saýal Almatyǵa kelgen Tasmaǵambetovke tótesinen qoıyldy.

Jaýabyn «Tergeýdiń aıaqtalýyn kúteıik» dep bastaǵanymen I. Tasmaǵambetov ońbaı shatylǵan eki baǵynyshtysyna qatysty óz oıyn jasyrmady Tipti, olardy «Aqshaǵa satylyp, óz betterinshe áreket etken» dep aıyptady.

Polkovnık Qaırat Pernebaev otbasymen. Sýret: otyrar.kz

Polkovnık Bekzat Jýmın. Sýret: otyrar.kz

«Halyq «syra koroli» atap ketken kisi ustala salysymen, maǵan T. Tóleshovtiń buryn MQM-de qyzmet atqarǵan ákesiniń qurmetine  uıymdastyrǵan «desanttar slety» atalatyn sharanyń vıdeosyn alyp keldi. Oǵan reseılik te áskerıler shaqyrylypty. «Sletta» kóp áskerı tehnıka kórsetilgen, ushaqtar da qatysqan...

Árıne, men birden qyzmettik tekseris taǵaıyndadym. Tekseris olardyń (B. Jýmın, Q. Pernebaev – red.) joǵarǵy qolbasshylyqtyń kelisimin almaı, óz betterimen áreket etkenin anyqtady. Sodan keıin men olardy komandır mindetin atqarýdan bosattym. Keıin olardyń isi Ulttyq qaýipsizdik komıtetine tapsyryldy.

Meniń oıymsha, bul jerde paraqorlyq sıpaty anyq kórinedi, olarǵa aqsha bergen..», - dep jaýap bergen I. Tasmaǵambetov.

T. Tóleshov ótkizgen "slettyń" vıdeosy