Atyraý oblysynda karantın jarıalandy. Bógde adamdarǵa ýaqytsha kirip-shyǵýǵa ruqsat joq. Sebebi, qalanyń kireberisinde qatań tekseris bastalyp ketti. Shetten mal satylyp alynbaıdy, ishten shyǵarylmaıtyn boldy. Alaıda, qaýipti vırýstyń taralýyna baılanysty jarıalanǵan karantınniń qansha ýaqytqa deıin sozylary áli belgisiz, - dep habarlaıdy Qamshy.kz 31 arnaǵa silteme jasap.
Atyraýdaǵy qazirgi jaǵdaı osyndaı. Qalaǵa kirer bette ár kólik, ár adam qatań tekseristen ótedi. Betterin tumshalaǵan mamandardyń bul áreketi óńirde jarıalanǵan karantınge tikeleı qatysty. Óıtkeni Atyraý oblysynda aýrý maldyń sany úsh myńnan asyp jyǵylǵan. Máselen, qala irgesindegi Keńózek aýyldyq okrýgine qarasty sharýashylyqtarda bir kúnde jalpy sany 51 bas múıizdi iri qaranyń aýrý ekeni anyqtalǵan. Al, mamandar derttiń aldyn alý úshin arnaıy ekpe jumystaryn júrgizýde.
- Barlyǵy da oqshaýlanyp, mal basy. Emdeý jumystary júrgizilip jatyr. Qazir Keńózek aýyldyq okrýgi boıynsha barlyq bas búgingi kúnge 51 bas bolyp tirkelip tur, - deıdi mal dárigeri Aıgúl Qurmanova.
Óńirde týyndaǵan jaǵdaıǵa baılanysty jıyn ótkizgen mamandar múıizdi iri qaranyń aýrýy alystan keldi dep otyr. Aıtýlarynsha Atyraýǵa kelgen mal aýrýy Astrahannan taralǵan. Muny mamandar málim etti.
- Astrahan oblysynyń maldarynan juqqany anyqtaldy. Nodýlárnyı dermatıt ekenin bylaı jalpy, bizdiń dárigerler bildi. Biraq, arnaıy referentnyı sentrden qorytyndy bolmaǵandyqtan ol aıtyla qoıǵan joq, - deıdi Atyraý oblystyq veterınarıa basqarmasynyń basshysy Nurbaı Abdyrahmanov.
Oblys boıynsha qazirdiń ózinde úsh myńnan astam múıizdi iri qara aýrýǵa shaldyǵyp, 250 basy ólgen. Mal aýrýyna nodýlárly dermatıt, ıaǵnı iri qaralardyń terilerinde isikter paıda bolyp, bórtpeler qaptaǵan dıagnozy qoıylǵan. Mamandar endi syrttan et, sút ónimderi kirgizilmeıtindigin, syrtqa shyǵarylmaıtynyn aıtady. Osyǵan oraı qala boıynsha sanıtarlyq bes beket jumys istep tur.
Atyraýda múıizdi iri qaralardyń aýrýyna baılanysty karantın jarıalanǵan bolatyn. Soǵan oraı syrttan qalaǵa kiretin kólikterdiń barlyǵyna dezınfeksıa jasalyp jatyr. Al, karantınniń qaı ýaqytqa sozylatyny belgisiz.
