Eýropa Keńesi memlekettik búlikke qatysqandardy qýdalap jatqan Túrkıa bıligin adam quqyqtaryn buzbaýǵa jáne zań ústemdigi qaǵıdasyn saqtaýǵa shaqyrdy, - dep habarlaıdy Qamshy.kz centralasian.org – ke silteme jasap.

Sársenbi kúni Ankaraǵa kelgen Eýroǵa Keńesiniń bas hatshysy Týrbórn Iaglandtyń málimdeýinshe, Eýropa elderi búlikshil toptyń Túrkıa sot júıesinde jáne ásker qurylymdarynda osyndaı aýqymdy júıeni qalaı qurǵanyn túsinbeı qaldy. Bul sózin ol Túrkıa SİM basshysy Mevlet Chavýshoglýmen birge ótkizgen baspasóz konferensıasynda aıtty.

Iagland - 16 shildege qaraǵan túni bolǵan áskerı búlikten keıin Túrkıaǵa kelgen eń joǵary laýazymdy eýropalyq ókil. Ankara búliktiń artynda qazir AQSH-ta turatyn dinı qaıratker Fethýllah Gúlen tur dep esepteıdi. Biraq Gúlenniń ózi bul aıyptaýlardy joqqa shyǵaryp keledi.

Túrkıa sátsiz aıaqtalǵan memlekettik tóńkeristen keıin 10 myńnan astam adamdy ustady, shamamen 70 myń memlekettik, polısıa jáne ásker qyzmetkeri jumystan bosatyldy nemese qyzmetten shettetildi. Elde tótenshe jaǵdaı engizilip, adam quqyqtary jónindegi eýropalyq Konvensıa jumysy ýaqytsha toqtatyldy.