Astana qalasyndaǵy Qazaqstannyń Bas memlekettik týyn kútip ustaý jumystaryn atqarý týraly kelisim-shart quny 38,78 mıllıon teńgeni quraǵan, - dep habarlaıdy Qamshy.kz.

Astananyń Esil aýdandyq ákimdigi «A&K Company» JSHS-men jasaǵan kelisim-shart quny osynsha somany quraıdy.

Memlekettik satyp alý qujattaryna «Konkýrs» túrinde uıymdastyrylǵan memlekettik satyp alý prosedýrasy ótpedi dep tanylǵan.

«A&K Company» JSHS ókilderin shaqyrý arqyly bir kózden memlekettik satyp alýlar kelisim-shartyn jasaý týraly sheshim qabyldandy», - delingen memlekettik satyp alýlar hattamasynda.

Elektrondy úkimet portalyndaǵy málimetterge sensek, atalǵan JSHS 2014 jyldyń 20 naýryzynda qurylǵan. Kompanıa negizinen elektrotehnıkalyq jáne jóndeý jumystarymen shuǵyldanady.

Esil aýdandyq ákimdigi 38 mıllıon teńgeniń «Qazaqstannyń Atameken kartasy» etnomemorıaldy kesheninde ornalasqan Qazaqstan Respýblıkasynyń Memlekettik Týyn kútip ustaýǵa jumsalatynyn habarlaǵan. Ákimdiktegilerdiń aıtýynsha qalada jaýyn-shashynnyń kóp túsýi men jeldiń saldarynan týdyń búlinýi jıi oryn alatyn kórinedi.

Astanadaǵy elimizdiń Bas Týy bıiktigi 111 metr bolatyn tý tuǵyrǵa ornalasqan. Týdyń ózi 450 sharshy metr. Osy tý men týtuǵyrdy kútip ustaýǵa, qajettilik týǵanda aýystyrýǵa astanalyq sheneýnikter 38 mıllıonnan astam qarajatty qıyp otyrǵan kórinedi.

Osy tusta nazar aýdararlyq bir jáıt, konkýrstyń bir ǵana áleýetti merdigermen kelisim jasaý arqyly ótýi. Ádette mundaı kelisimder konkýrsqa bir ǵana qatysýshy qujat usynyp, basqa baǵa usynystary bolmaǵanda ǵana jasalady. Al, túrli qyzmet kórsetýshi kásiporyndar qomsynatyndaı, konkýrsqa qatysýdan bas tartatyndaı 38 mıllıon teńge az aqsha emes.

Memlekettik Tý – eldigimizdiń basty sımvoly. Onyń Astanada júndeı tútilip, jyrtylyp jatqanyn eshqaısymyz qalamaımyz. Bastysy memlekettik rámizimiz túrli jemqorlyq sqemalardyń sımvolyna aınalyp ketpese boldy.