Qazaqstandyq lıngvıs-ǵalymdar aǵylshyn tilin 1 synyptan bastap oqyp kele jatqan tájirıbeli mektepterdiń oqýshylary arasynda keshendi zertteý júrgizýdi usynyp otyr, - dep habarlaıdy Qamshy.kz 24.kz - ke silteme jasap.

Bul týraly Almatydaǵy Ǵylym ordasynda ótken jıynda aıtyldy. Lıngvıs-ǵalymdardyń pikiri eki máselege kelgende qaq jaryldy. Balaǵa shet tilin neshinshi synyptan bastap úıretý kerek, jaratylystaný pánderin joǵary synyptarda aǵylshyn tilinde oqytý qanshalyqty paıdaly degen taqyryptar qyzý pikirtalas týdyrdy. «Sondyqtan, erte jastan shet tilin oqyp kele jatqan balalardy keshendi zertteý júrgizsek, kóp suraqqa jaýap alar edik», - deıdi mamandar.

- Solardyń tiline, tanymdyq dúnıesine, psıhologıasyna zertteý jasap kóreıik degen usynys kóp túsip jatyr. Bul zertteý keshendi bolýy kerek degen usynys ta kópteý boldy. Ol zertteýdiń nátıjeleri bul saıasatty ary qaraı tıimdi túrde júzege asyrýǵa úlken septigin tıgizedi, - deıdi A.Baıtursynuly atyndaǵy Til bilimi ınstıtýty dırektorynyń orynbasary Anar Fazyljanova.