Búgin Aqtóbe qalalyq №2 soty QR Ádilet mınıstrligi Sot saraptamalyq ınstıtýty Aqtóbe fılıalynyń dırektoryna qatysty úkim shyǵaryp, oǵan tórt jyl segiz aı merzimde bas bostandyǵynan aıyrý jáne múlkin tárkileý jazasyn kesti, - dep habarlaıdy Qamshy.kz.
Instıtýt fılıalynyń dırektory Maral Mustafa Ábilqaıyr han kesenesine jóndeý júrgizgen «AınÁD» JSHS ókilinen para alǵany úshin aıyptaldy.
Maral Mustafany Jemqorlyqqa qarsy is-qımyl jónindegi Ulttyq búro qyzmetkerleri 6 aqpan kúni 500 myń teńge kóleminde para alyp jatqan sátinde qolǵa túsirgen.
Tergeý málimetterine saı, M. Mustafaǵa para bergen «AınÁD» JSHS Aqtóbe oblysy Áıteke bı aýdanyndaǵy «Han molasy» zıratyndaǵy Ábilqaıyr han kesenesine jóndeý júrgizip, onyń syrtyn ádettegi keramogranıtten alty ese arzan sapasyz materıalmen qaptaǵan. Jóndeý jumysy úshin memleket qazynasynan 30 mıllıon teńge alǵan kompanıa osylaısha 25 mıllıon teńgeni únemdep qalǵany aıtylady.
Merdigerdiń jumysyna kóńili tolmaǵan oblystyq ákimdik ony sotqa berip, baǵa aıyrmasyn óndirip alýdy suraǵan. Sot atalǵan nysandy qaptaǵan materıalǵa saraptama taǵaıyndaıdy. Sot materıaldary saraptama ınstıtýty fılıalyna túse salysymen onyń qyzmetkeri Meırambek Bekbergen «AınÁD» JSHS ókiline habarlasyp, máseleni fırmanyń paıdasyna «sheshý» jolyn usynǵan. Sot saraptama ortalyǵynyń bergen qujaty kásiporyndy búdjetten jymqyrǵan qarjysyn janynda qaldyrýǵa múmkindik beretin bolǵan soń, kompanıa basshylyǵy M. Bekbergen suraǵan 1 mıllıon teńgeni kópsinbeı, saraptama ortalyǵynyń ókiline ákep bergen. Atalǵan somany alý sátinde M. Bekbergen jemqorlyqqa qarsy qyzmet ókilderiniń qolyna túsedi. Ulttyq búro qyzmetkerlerine ol atalǵan somanyń teń jartysy óziniń bastyǵy M. Mustafaǵa tıesili ekenin aıtady. Búro qyzmetkerleri M. Bekbergendi M. Mustafaǵa 500 myń teńge «úlesin» aparyp berýge jumsaıdy. Osylaısha, qyzmetin jeke múddelerine paıdalanbaq bolǵan qosy sarapshy da quqyqqorǵaý organdarynyń quryǵyna ilingen.
Kinásin moıyndaǵany úshin M. Bekbergenge qatysty qylmystyq is toqtatylyp, basshysy M. Mustafanyń isi sotqa jetken.
Al, Ábilqaıyr memorıalyna qatysty saraptama qaıtadan taǵaıyndalǵan.
