Osy jyldyń besinshi aqpanynda «Bizdiń Sırıamen 911 shaqyrymǵa sozylǵan shekaramyz bar. Reseıde bar ma? Iranda bar ma? Olardyń ol jerde ne jumysy bar?» degen Erdoǵan myrza bul joly «Reseıdiń qatysýynsyz Sırıa máselesin sheshý múmkin emes. Tek qana Reseımen jumys isteı otyryp Sırıadaǵy daǵdarysty sheshýge bolady» degen málimdeme jasady.
Túrkıa prezıdenti Redjep Taıyp Erdoǵan, Reseı lıderi Vladımır Pýtınmen Sankt-Peterbýrgta uıymdastyrylǵaly otyrǵan kezdesýler nátıjesinde eki el arasyndaǵy baılanystyń jańa beti ashylady degen bolatyn.
Reseılik «ITAR-TASS» agenttigi basshysynyń orynbasary Mıhaıl Gýsmanǵa bergen suqbatynda, «Bul tarıhta qalatyndaı bir kezdesý, jańa bir bastaý dese bolady. Baýyrym Vladımırmen bolatyn kezdesý arqyly eki el arasyndaǵy baılanystyń jańa deńgeıine jetemiz dep senemin. Eki eldiń birlese otyryp atqarar jumysy kóp» degen oıyn bildirdi. Jarıalanǵan reportajda Sırıa máselesin sheshýdegi Reseıdiń qatysýy mańyzdy ekendiginiń astyn syzyp aıtqan Erdoǵan «Reseıdiń qatysýynsyz Sırıa máselesin sheshý múmkin emes. Tek qana Reseımen jumys isteı otyryp Sırıadaǵy daǵdarysty sheshýge bolady» dedi.
Al, 5 aqpan kúni Erdoǵan, «Reseı Sırıa máselesin sheshýmen qoly bosamaı jatyr. Sırıamen shekarasy bar ma edi?» dedi.
Reseıdiń, Túrkıa elin Sırıaǵa qarsy áskerı kúsh biriktirip otyr degen aıyptaýyn eske túsirýine jaýap retinde Erdoǵan bylaı degen edi: «Reseıdiń bul máselege osyndaı jolmen jaqyndaýyn kúlkimen qabyldaımyn. Aldymen, Reseı qazirgi tańǵa deıin Sırıa shekarasynda óltirgen adamdary úshin jaýap bersin. Rejımmen birlesken jumysy nátıjesinde qaza tapqandar sany 400 myńǵa jetti. Qazirgi tańda Reseı, Sırıa máselesin sheshýmen qoly bosamaı jatyr. B. Aasadqa shaǵyn bir memleket qurýǵa tyrysyp júrgendeı syńaı tanytady. Sebebi Asadtyń Sırıadaǵy kúshi taýsyldy dese bolady. DAISH teror uıymy, basqa da terorlyq uıymdar Sırıany bólisip alǵan jaǵdaıy bar. Al Túrkıaǵa qazirgi tańda qaýip tónip tur. Bizdiń Sırıamen 911 shaqyrymǵa sozylǵan shekaramyz bar. Reseıde bar ma? Iranda bar ma? Olardyń ol jerde ne jumysy bar? Olar bolsa: «Bizdi Asad shaqyrdy» deıdi. Shaqyrylǵan ár jerge barýǵa bolmaıdy. Sebebi ol jerde úkimetke terror qaýpin tóndirip turǵan Asad bar. Olar óte zalym, qanisherler. Olardy qoldaıtyndar da bul qylmysqa ortaq bolady.»
Aǵylshynnyń Financial Times gazeti, Erdoǵannyń 15 shilde oqıǵasynan keıingi alǵashqy sapary Reseıge josparlanǵanyna nazar aýdaryp, Ankara-Máskeý baılanysy Batysty mazalamaı qoımaıdy dep habarlady. Túrkıa Reseıdiń sırıalyq kúrdterge berip otyrǵan qoldaýdyń azaıatyndyǵyn kútedi delingen. Aǵylshyn gazetine suqbat bergen Evropa dıplomaty bolsa, Erdoǵanǵa Evropanyń qajettigin aıtyp, «Erdoǵan Pýtınge senim bildire almaıtyndyǵyn biledi. Sońǵy 3 ǵasyrdyń ishinde qansha túrik-orys qaqtyǵysy boldy? Olardyń qanshasyn Túrkıa jeńdi?» dep suraq tastaıdy.
