Shyǵys Qazaqstanda aýyl sharýashylyq jerlerin jalǵa alǵan qazaq-qytaı birikken kásipornynyń basshylaryna qatysty qylmystyq is qozǵaldy,- dep habarlaıdy Qamshy.kz.

Bul týraly Feısbýk áleýmettik jelisinde ózin «Nur Otan» partıasynyń múshesi dep tanystyryp júrgen belsendi Aıdyn Egeýbaev jarıalady.

«Sizderge Shyǵys Qazaqstan oblysy Úrjar aýdanynda Qytaı azamattarynyń ınvestısıa salý maqsatynda 90000 ga jýyq jer alyp alǵandyǵy týraly, Qytaı kompanıalarynyń Qazaqstan memleketinen sýbsıdıa alǵandyǵy týraly jarıalaǵan bolatynbyz.

«Uly Dala Qyrandary» Respýblıkalyq qozǵalysy jáne «Alash joly» qozǵalysy birlesip osy máselelerdi anyqtap, qazirgi tańda quzyrly mekemeler qylmystyq is qozǵalǵany týraly málimetti jarıalap otyrmyz», - degen ol osy máseleni qoǵamnyń qyraǵy qadaǵalaýyn suraıdy.

Buǵan deıin saıasatker Muhtar Taıjan qytaılyqtardyń úlesi bar «Dáremet» JSHS jalǵa alǵan jerin «Bátýa» JSHS-ǵa bergeni, «Bátýanyń» memleketten 2012-2015 jyldary 500 mıllıon teńge qarjylaı dotasıa alyp, ony durys ıgermegeni anyqtalǵanyn jazǵan edi.

Esterińizge salsaq, Aıdyn Egeýbaev Úkimet janyndaǵy Jer komısıasynyń otyrysynda SHQO-da 90 myń gektarǵa jýyq jer ýchaskelerin qytaılyq kompanıa paıdalanyp otyrǵanyn málimdegen edi. Keıin buryn SHQO-da ákim bolǵan Berdibek Saparbaev óziniń eshqandaı kompanıaǵa zańsyz jer bermegenin aıtyp, A. Egeýbaevtiń ústinen sotqa shaǵymdanǵan bolatyn.