Aqtóbe oblysynyń ákimi Berdibek Saparbaevtyń jer máselesi boıynsha belsendi Aıdyn Egeýbaevtyń ústinen jazǵan aryzyn Almaty qalasy Alataý aýdandyq soty qaraıdy,- dep habarlaıdy Qamshy.kz.

Sottyń alǵashqy tyńdaýy 16 tamyzǵa belgilengen.

Esterińizge salsaq, Aıdyn Egeýbaev degen azamat Úkimet janyndaǵy Jer reformasy jónindegi komısıa otyrystarynyń birinde Shyǵys Qazaqstan oblysyn B. Saparbaev basqaryp turǵan tusta oblystyń Úrjar aýdanynda 87437 gektar jer qytaılyqtarǵa berilgenin málimdegen edi. A. Egeýbaevtyń aıtýynsha, 2010-2011 jyldary aýylsharýashylyq maqsattaǵy jerlerdi «Dáremet» JSHS (29827 gektar, dırektory – S. Hvan), «Yrǵyn» JSHS (8712 gektar, dırektory A. İzimǵalıev) jáne «Manfagat» JSHS (49903 gektar, dırektory N. Tasmuratov) alǵan kórinedi.

Al, 2009-2014 jyldary SHQO-ny basqarǵan B. Saparbaev ol ýaqytta eshqandaı jer sheteldikterge berilmegenin dáleldeıtinin, A. Egeýbaevty sotqa beretinin málimdedi.

BAQ-qa bergen suhbatynda A. Egeýbaev «Men jerdi Saparbaevtyń ózi satty demedim, tek 2010 jyly qytaılar kelgende oblys ákimi Saparbaev bolǵanyn aıttym», - degen ýáj aıtady.

Sondaı-aq, búgin osy «Dáremet» JSHS quryltaıshylarynyń biri bolyp tabylatyn «Bátýa» fırmasynyń ústinen qylmystyq is qozǵalǵany belgili boldy.