Ár musylman ul balasyn súndetke otyrǵyzyp, balanyń alǵashqy toıyn jasaıdy. Bul qýanyshqa alys-jaqyn, úlken-kishiniń bári ortaqtasady.
Alpysty alqymdaǵan Gúljan bes qyzdy tárbıelep ósirgen. Enesi soǵys kezinde «ul tappasań da meıli, erkek kindiktiniń bári soǵysqa ketetin bolsa, qyzdarymyz kóz aldymyzda júr ǵoı» dep uldy bolmaǵanyna asa mán bermepti.
Beıbitshilik zaman ornap, bes qyzy qıaǵa qonǵanda ana sútimen daryp, ortanshy qyzy Marıa otaýyna barǵaly qyzdata beripti.
Baıaǵynyń adamdary joq qazir, jetinshi qyzyn ómirge ákelgende Marıanyń kúıeýi «endi ul tappasań, ketemin» degen áńgimeniń shetin shyǵara bastaıdy. Janyn shúberekke túıgen kelinshek jeti qyzben qaıda syımaqpyn dep, mazasyz kúnderdi basynan ótkerip jatady.
Anasy Gúljan qyzyna qydyryp kelgende kúıeý balasy men qyzynyń arasyndaǵy áńgimege qanyq bolady. Sonda «qyzym, marqum enem aıtyp otyrýshy edi. Ul tappaǵan áıel súndettelgen balanyń saqtalǵan «múshesin» ezip jese, ul tabady dep. Kóneniń kózin kórgen ǵoı ájeń. Osy yrymdy jasap kórseńshi» dep aqyl aıtyp ketedi.
Marıanyń oıynan anasynyń osy bir áńgimesi esh ketpeı-aq qoıdy. Ul tapqan áıelderden keregin surap ta júrdi.
Bir kúni kórshi aýylǵa baryp qalyp, osyndaı áńgimege kýá boldy. Ol aýyldyń áıelderi de «ul tappaǵan áıelge súndettelgen balanyń saqtalǵan kúpegin berý týraly aıtyp jatty. «Úsh ulymdyki de sandyqtyń túbinde saqtaýly. Enemiz saqta degen soń qoıa salǵam. Áıtpese, sol yrymnyń rastyǵyna onsha ılana bermeımin» dedi ádemishe kelgen bir kelinshek.
«Kókeshim, úsheýin de maǵan bershi. Men senem. Bershi» dep ótindi Marıa. Júgire basyp úıinen alyp shyqqan kelinshektiń «muny untaqtaý kerek shyǵar» degenine qaramastan «men osylaı-aq jeı beremin» dep aýyzǵa alyp urdy.
Kópten saqtalǵan teri qatty bolyp, kelinshektiń óńeshin jyrtyp jibere jazdaǵan. Aptalap as-sý ishe almaı, óńeshi aýyryp ta júrdi.
Keshe anam kóshede Gúljan apaıdy kóripti. Marıa qyzynan týrǵan nemeresi Aısultandy qyrqynan shyǵarýǵa asyǵyp barady eken. Kózi qýanyshtan bal-bul jaınaıdy deıdi.
P.S. Bul jáı ǵana yrym bolýy múmkin. Degenmen Qudaı áıel adam soǵan senip, jegen nıetine bergen de shyǵar. Qazaqtyń ár yrymynyń óz astary bary anyq.
Indıra Qýat
