Búgingi tańda elimizde memlekettik satyp alýlardy ótkizý merzimi uzarǵan kezde memlekettik baǵdarlamalar aıasyndaǵy kóptegen jumystar kesh oryndalyp jatady. Osyǵan baılanysty memleketti satyp alýlar júıesin barynsha jetildirý kerek. Úkimettiń búgingi otyrysynda Premer-mınıstrdiń orynbasary Darıǵa Nazarbaeva osy salada kórshi Reseı Federasıasynyń tájirıbesin qoldanýdy usyndy, - dep habarlaıdy Qamshy.kz Baq.kz – ke silteme jasap.

«Búginde memlekettik satyp alýlar máselesi ózekti bolyp tur. Ásirese, memleketik satyp alýlardy ótkizý merzimin keshiktirgen kezde tıisti jumystar turalap jatady. Bul – jyl saıyn qaıtalana beretin másele. Biz ony ylǵı talqylap jatamyz. Osyǵan baılanysty bir usynys bar. Qazirgi kezde reglament pen prosedýrany qaıta qarap shyǵý qajet. Memlekettik satyp alýlardy ótkizýdiń naqty merzimin engizý kerek. Sosyn konkýrstyq sharalar jaǵynan qıyndyq bolyp jatsa da, jumystar toqtatylmaýy tıis. Sondaı-aq memlekettik baǵdarlamalarǵa jaýaty ákimshilerdiń jeke jaýapkershiligin engizgen jón»,-dedi D.Nazarbaeva Úkimettiń búgingi otyrysynda.

Onyń aıtýynsha, búginde memlekettik baǵdarlamalar boıynsha bólinetin qarjyny ıgerý boıynsha kórshi Reseı Federasıasynyń tájirıbesin zerdelep shyǵý qajet. Sebebi ol jaǵynan reseılikter birshama alǵa ketip qaldy.

«Olarda memlekettik tapsyrys boıynsha jeńimpaz atanǵan kásiporynnyń bank esep-shoty ashylady. Soǵan aqsha aýdarylady. Biraq ony tek tapsyrys berýshiniń ruqsatyn alǵannan keıin ǵana jumsaýǵa bolady. Osynyń arqasynda búdjet qarajatynyń jumsalýyn baqylap otyrýǵa múmkindik bar»,-deıdi Úkimet basshysynyń orynbasary.

Aıta keteıik, Úkimettiń búgingi otyrysynda «Nurly jol» memlekettik baǵdarlamasy aıasynda bólingen qyrýar qarajatty ýaqytynda ıgerý máselesi qaraldy. Búginde jergilikti jerde aqshany ıgerý boıynsha konkýrstyq jumystar baıaý ótkiziletindikten, baspana salý, ınfraqurylym tartý, mektep pen balabaqshalardy turǵyzý jumystary kesh atqarylady. Ákimder qyrkúıektiń 1-ine deıin osy máseleni sheshýge ýáde berdi.