Ulttyq qaýipsizdik komıteti memlekettik satyp alý sheńberinde Qazaqstan Respýblıkasy Qarýly Kúshteriniń qajettiligine bólingen búdjettik qarjyny urlaýmen aınalysqan iri qylmystyq toptyń is-qımylyn anyqtap, jolyn kesti, - dep habarlaıdy Qamshy.kz UQK baspasóz qyzmetine silteme jasap.

"Jedel-izdeý is-sharalary barysynda QR QK Materıaldy-tehnıkalyq qamtamasyz etý bas basqarmasy bastyǵynyń orynbasary podpolkovnık T. Jýmkazıevtiń Qorǵanys mınıstrligi men Qarjy mınıstrliginiń laýazymdy tulǵalary jáne birneshe ózara úlestes komersıalyq qurylym basshylary tartylǵan sybaılas jemqorlyq sqemasyn uıymdastyrǵandyǵy anyqtaldy", - dep habarlaıdy UQK baspasóz qyzmeti.

Qorǵanys vedomstvosynyń konkýrstyq komısıasynyń tóraǵasy bolǵan T. Jýmkazıev atalǵan kásipkerler múddelerine yqpaldastyq etken, óziniń zańǵa qaıshy áreketterin jasyrý úshin Qorǵanys mınıstrligi men Qarjy mınıstrlikteri organdaryn baqylaýshy laýazymdy tulǵalardyń múmkindikterin qoldanǵan.

8 tamyzda podpolkovnık T. Jýmkazıevti 20 mln. teńge para alyp jatqan jerinde UQK Áskerı qarsy barlaý departamentiniń qyzmetkerleri ustaǵan.  

Qozǵalǵan qylmystyq is sheńberinde qorǵanys jáne qarjy mınıstrlikteriniń barlyǵy 5 laýazymdy tulǵasy, 4 JSHS basshysy ustalypty. Olardan edáýir kólemde otandyq jáne sheteldik valúta tárkilengen.

Atalǵan qylmystyq sqemaǵa birtalaı ózge de memlekettik organdar laýazymdy tulǵalarynyń jáne komersıalyq kásiporyndardyń qatystylyǵy tekserilýde.

Jedel-tekserý is-sharalary jalǵasýda, olardyń nátıjeleri qosymsha habarlanatyn bolady.