Jaqynda ǵana Reseıdiń Ýkraınany Kedendik odaqqa tartý týraly qupıa qujattary jarıalandy. İshinde san-alýan tásilder men tehnologıalar kórsetilgen. Keshegi "Roshen" kámpıtterine tyıym salý da, sonyń bir joly. Aldymen muqatyp, naryǵynan aıyryp, artynan "áriptes, aksıoner bolaıyq, sonda Reseıde saýdań júredi" dep kompanıanyń quramyna kirip alý. Ýkraındyqtar osynyń saldaryn jaqsy túsinip otyr, halqy da belsendi qarsylasyp jatyr.
Biz mynany uǵýymyz kerek sıaqty. Túbi Kedendik odaqtyń esh bolashaǵy joq. Biraq, osyny paıdalanyp, Reseı aınalasyndaǵy barlyq naryqtardy jaýlap almaq. Al barlyq mańyzdy degen naryqtardy jaýlap alsań, odan artyq bılik pen baqylaýdyń qajeti de shamaly. Eger barlyq kompanıalaryń Reseı kásipkerleriniń qolyna ótip ketken bolsa, seniń bıligiń de eshteńe isteı almaıdy. Eldegi shetel ınvestorlary degender júr ǵoı taırańdap!
Iaǵnı, Kedendik odaq eń aldymen qazaq naryǵyn jaýlaýdyń orys úshin asa ótimdi, tıimdi joly. Apta saıyn Reseı ózinde shyǵaratyn taýarlardy ótkizý úshin Kedendik odaq aıasyndaǵy baj, keden salyqtaryn ósirýmen keledi. Birese shyny, birese qondyrǵylar, birese taǵy basqasy. Mysaly, osynyń arqasynda Qazaqıada satylatyn orys avtokólikteriniń sany artyp keledi. Qýlyqpen, qysymmen orys máshıneleriniń satylymy 80 paıyzǵa ósip, elde satylǵan eki máshıneniń biri reseılik máshıne boldy. Paıda ma? Taza paıda. Osy arqyly óz ónerkásibin qoldap otyr. Sapasy - nól, shashylyp qalatyn dúnıesin ótkizip jatyr.
Orystyń «Sberbank» degen banki naryǵymyzǵa basa kóktep kirip jatyr. Ondaǵy depozıtterdiń sany men somasy tez arada ósip ketti. Bul óte iri bank, onyń baǵany da tómendetip, jumysynyń sapasyn bıik deńgeıde ustap otyrýǵa múmkindigi bar. Biraq, erteń óz maqsatyna jetip, naryqty alǵan soń baǵasyn ósiretini belgili. Bir-birlep maıda-shuıda bankterdi satyp alyp, erteń nómiri birinshi bankke aınalýy ábden múmkin dúnıe. Dál osy tásilmen Reseı qazaqtyń temirjolyn almaqshy. «Aeroflot» «ishki reısterge» kirgisi kelip, jantalasyp jatyr. Erteń arzan reıster jiberip, sapaly ushaqtary bar «Eır Astanany» muqatyp, ony da satyp alý nıetteri bar. Qazir, mysaly Armenıanyń avıasıasy Reseıge ótip ketti. Bizdi de sol sıaqty qylmaq.
Demek, odaqbastyq degenimiz eń aldymen Reseı kapıtalynyń ekspansıasyn qamtamasyz etý quraly. Esesine Reseı bizdiń birde-bir kompanıaǵa jeńildik jasamaıdy. Bizdiń taýarlardy ishki naryǵyna ólse de jibermeıdi. Bul aıdan-anyq!
Buǵan ne isteýge bolady? Meniń oıymsha, qoǵam oıanyp, beıbit narazylyq aksıalaryn ótkizip, Reseıge narazylyqtarymyzdy únemi, turaqty jetkizip turýymyz kerek. Qoldan kelip jatsa Reseı taýarlarynan bas tartýymyz kerek. Reseı ónimderin almaýymyz kerek. Az da bolsa óz ónimderimizdi alyp, óz óndirýshilerimizdi qoldaǵanymyz jón. Reseı máshınesin minip júrý - azǵyndyqtyń sımvoly bolýy kerek. Reseı bankisine barý - satqyndyqtyń sınonımine aınalýy tıis. Reseıdiń elektrondy poshtasyn paıdalaný - máńgúrttiktiń birinshi satysy dep sanalýy qajet. Táýelsizdik alarynyń aldynda Úndistan osyndaı saıasat júrgizip jeńip shyqty.
Iaǵnı bizdiń aldaǵy ýaqyttaǵy saıasatymyz - Reseıge qarsy narazylyq tanytý, bul narazylyqty údete túsý, halyqtyń rýhyn oıatý, kózin ashý. Reseı taýarlary men ónimderine boıkot jarıalaý, árbir nysanymyzdy, kásipkerimizdi qyzǵyshtaı qorǵaý, belorýs, ýkraın, qyrǵyz áriptesterimizben belsendi qarym-qatynas ornatyp, solarǵa da rýhanı, adamı, azamattyq kómegimizdi kórsetý. Kóp túrikrse kól demekshi, keshegi Reseı otarlary bolǵan memleketter birigip, belsendi saıasat júrgizip jatsa, bir-biriniń taýarlaryn qoldap jatsa, túbi Reseı de synady. Tek ózimiz myqty bolýymyz qajet. Eger burynǵy Reseı kolonıalary birigip, áreket etse, olardyń naryǵyndaǵy adam sany Reseıden asyp túspese de, kem túspeıdi.
Aıdos Sarymnyń Feısbýktegi paraqshasynan alyndy
