Mektep oqýshylaryna jappaı bir úlgide kıiný týraly talap qoıylmaıdy. Bilim jáne ǵylym mınıstrliginiń ókilderi mektep formasyna qatysty osyndaı túsinikteme berip otyr., - dep habarlaıdy Qamshy.kz Astana telearnasyna silteme jasap.
Iaǵnı elimizde biryńǵaı forma júıesi engizilgenimen, onyń úlgisin tańdaý bilim ordalarynyń qalaýyna berilgen. Bul úrdis aldaǵy ýaqytta da solaı qala bermek. Aıta keteıik, sońǵy ýaqytta «eldegi mektep oqýshylarynyń barlyǵy birdeı kıinýi tıis» degen aqpar taraǵan edi.
Jańa oqý jyly jaqyndaǵan saıyn qarbalas kúıge túsetin ata ana kóp, solardyń biri - astanalyq Kárıma Shońǵaraeva. Tuńǵysh nemeresi Ajar birinshi synypqa barmaq. Kitap-dápteri men sómkesi rettelgen. Endi mektep formasyn alý kerek. Bıyl № 65 mekteptiń oqýshylary úshin trıkotajdan tigilgen kıim úlgisi tańdalypty.
Bir aı buryn tapsyrys bergenbiz. Endi daıyn kıimdi alaıyq dep turmyz. Jaqsy kıimi, óte jarasyp tur. Ádemi. Taǵy basqa kıimder alamyz. Áli eki kóılegi, sport kıimi bar. Shamamen endi 50-60 myńǵa barady, - deıdi Astana qalasynyń turǵyny Kárıma Shońǵaraeva.
Eń bastysy - kıim yńǵaıly. Sondyqtan ájeı nemeresinen qarajatty aıap qalǵysy joq. Jalpy sońǵy 10 jyldan beri elimizde árbir mekteptiń ózindik formasy bar. Basty shart - klasıkalyq úlgiden aýytqymaýy tıis. Myna shaǵyn seh Astanadaǵy 15 mektepten tapsyrys alǵan.
Ár mektepke jańa usynystaryn engizýge tyrystyq. Biraq kóp mektepter óziniń eski formasynda qalǵysy keldi. Baǵa jaǵyn aıtatyn bolsaq, biz búkil shıkizatty shetelden alyp kelemiz. Sondyqtan baǵa da ózgeredi. Byltyr 13 myń 900 bolsa, bıyl 16 myń 700-den. Komplektter. Oǵan kofta trıkotajdy, jılet, sosyn shalbar nemese ıýbka kiredi, - deıdi dúken jelisiniń dırektory Beıbit Qulshybaeva.
Sońǵy ýaqytta BAQ betterinde "elimizde oqýshylar formasy biryńǵaı júıege kóshedi eken" degen aqpardyń tarap jatqany bar. Tipti ǵalamtorda onyń alǵashqy syzbasy da kórsetilgen. Biraq bul málimetti Bilim jáne ǵylym mınıstrligi joqqa shyǵardy. Vedomstvo ókili, oqýshylardyń kıim úlgisi áli de árbir mekteptiń ishki tańdaýy, deıdi.
Biryńǵaı mektep formasyn engizý kózdelmegen. Mektep formasyn engizý mektep uıymynyń jáne ata-analardyń quzyretinde. Sol sebepten ár mektepte mektep formasy erekshe bolady, - deıdi QR Bilim jáne ǵylym mınıstrligi departament basshysynyń mindetin atqarýshy Qalken Jakın.
Degenmen, mınıstrliktiń de ózindik talaby joq emes. Tıisti erejelerge sáıkes, mektep formasynda úshten artyq tústiń aralaspaýy shart. Alergıalyq aýrýlar qozdyrmaıtyn, klasıkalyq úlgidegi, jyly, ári qozǵalýǵa yńǵaıly matadan tigilýi tıis. Ózgesi ata-ananyń qalaýynda. Máselen, №65 mekteptiń ata-analar keńesi bıyl tańdaýdy sapa men baǵaǵa jasapty.
Ata-analar keńesinen 7 adam kirdi. Sóıtip, qara-kók tústi kıimdi tańdadyq. Ol - sharshaýdy basatyn tús. Mata da jaqsy. Eń bastysy - baǵasy qoljetimdi. Óıtkeni bireýdiń shamasy bar, bireýdiki joq degendeı. 3-4 balasy barlarǵa tipten qıyn. Menińshe, oqýshylar bir-birinen erekshelenbeýi tıis, - deıdi №65 mektep ata-analar keńesiniń tóraıymy Nurgúl Quspanova.
Búginde mektep formalary bazarlar men jármeńkelerge de shyǵarylǵan. Biraq munda da qalaǵanyn tappaı júrgen ata-analar qaýymy jeterlik eken. Kópshiligi álbette baǵanyń tym qymbattyǵyn alǵa tartady. Al oqý merzimi bolsa, bastalýǵa taıap qaldy.
