Almaty irgesindegi Kóksaı aýylynyń turǵyndary baǵdarshamǵa zar bolyp otyrmyz deıdi. Qarasaı aýdanyna qarasty aýyl turǵyndary kólik keptelisi saldarynan kóptegen qıyndyqtar týyp otyrǵanyn aıtady. Qamshy.kz redaksıasyna joldanǵan kóksaılyqtardyń hatyn tolyq kúıinde jarıalap otyrmyz.
Almaty oblysy Qarasaı aýdanyna tıesili İrgeli, Kóksaı t.b. aýyldar men eldi mekenderdiń kópshiligi Almaty qalasynyń irgesinde ornalasqandyqtan, tipti qalanyń jalǵasy ispetti. Buryn Qarasaı aýdanyna qaraǵan Alǵabas sekildi olardy da qalanyń quramyna qosý talaby ýaqyt ozǵan saıyn týyndap jatqan syńaıly. Qala men oblystyń shekarasynda turǵan bul jerdegi halyq qaı jaqqa baryp máselesin sheshý kerektigin de keıde túsinbeı qalady. Bul jalpylama másele bolǵanmen, búgingi biz kóterip otyrǵan jaıtpen mazmundas bolǵan soń, aıtyp otyrmyz.
Joǵaryda aıtyp ótken eldimekenderde turyp jatqan halyqtyń negizgi máselesiniń biri – jol keptelisi.
Qarasaı aýdany Kóksaı aýylyndaǵy Qojabekov pen Araı kósheleriniń qıylysyndaǵy, halyq tilinde «túrikter aınalmasy» dep atalyp ketken aınalma jol kóliktiń júrý sany jaǵynan qalanyń keıbir kóshelerinen asyp túsedi.
Sebebine úńilsek, Qazaqstan boıynsha eń úlken megapolıs – Almaty qalasynyń ózinde tirkelgen kólikterdiń sany qazir 600 myńǵa jýyqtasa, kúnine 300 myńnan asa kólik ózge óńirlerden kelip kiredi eken. Olardyń 40-50% - Almaty-Bishkek baǵytynan, ıaǵnı Altyn Orda bazary jaqtan keledi. Raıymbek dańǵylyndaǵy jol keptelisinen «qashpaqshy» bolǵandar da «túrikter aınalmasy» arqyly qalaǵa kirýge jáne keshke qaraı shyǵýǵa tyrysady.
Bul óz kezeginde tańerteń 7:30-9:30 arasynda keshke saǵat 17:30-21:00 ǵa deıin saǵattap jalǵasyp jatatyn jol keptelisin týdyrady. Mashınalar biriniń artynan biri sıgnal berip, aıqaıdy salyp, tipti bir-birimen eregesip jatatyndarda úırenshikti jaǵdaıǵa aınalǵan. Bul aınalma joldyń boıyndaǵy kúndelikti kórinis osy. Eshkimniń de bireýmen keńirdek jyrtysyp ursysqysy joq árıne. Tek, júıkeni tozdyrǵan jol keptelisi tańerteń jumysqa, keshke jumystan sharshap úıge qaıtýǵa asyqqan jandardyń sabyryn taýysyp jiberedi.
Kólik keptelisi qazirgi zamanda árıne barlyq kóshede kezdesedi. Degenmen dál osy «túrikter aınalmasyndaǵydaı» kúnige saǵattap sozylmaıdy. Jolyn tapsa, ákimshilik tıisti oryndar naqty is áreketke kóshitin bolsa sheshilmeıtin qıyn sharýa emes.
Kóksaı aýylynda ornalasqan aınalma joldyń boıynda oryn alyp otyrǵan, halyqtyń júıkesin ábden juqartyp bitken bul jaıttyń sheshimi – baǵdarsham qoıý. Sondaı-aq baǵdarshamǵa zar bolǵan aınalma jol boıynda jol-kólik oqıǵalary da jıi oryn alady. Onyń saldarynan týyndaǵan keptelister tipti saǵattap sozylady.
Jergilikti halyq qarapaıym ǵana másele uzaqqa sozylmaı, Qarasaı aýdany ákimshiligi, aýdandyq Jol polısıa basqarmasy tarapynan kóńil bólinip, baǵdarsham qoıylatynyna úmittenedi.
