Aqtóbedegi terakt kezinde kúdiktiler qataryna ilingen aǵaly-inili Samat pen Sanat Qojanıazovtar oblystyq İİD-ni sotqa berdi. Olar quqyq qorǵaý organynyń ózderin aqtap, moraldyq shyǵyn tólegenderin talap etip otyr, - dep habarlaıdy Qamshy.kz kerek-info.kz - ke silteme jasap.
Muǵaljar aýdany Jańajol aýylynyń turǵyny kúdiktiler tizimine kezdeısoq ilikkennen beri inisimen ekeýi azap shekkendigin aıtady. Aıtýynsha, izdeýde júrgen terrorıster qatarynda bolǵanǵandyqtan, eki kózi birdeı kórýden qalǵan anasyn emdetý úshin shetelge de shyǵa almaı otyr.
-Osy oqıǵaǵa deıin 64 jastaǵy anamnyń densaýlyǵy jaqsy edi. Meni jazyqsyz “terrorıster tizimine” qosqannan keıin eki kózi sý qarańǵy bolyp, kórmeı qaldy. Emdetý úshin Ýfaǵa aparýym kerek edi. Alaıda kúdiktiler tiziminde bolǵandyqtan, bara almadym. Amalsyz, anammen birge qudaǵaıymdy ertip jiberdim. Endi Qytaıǵa aparýym kerek. Biraq, izdeýde júrgendikten meni taǵy da shekaradan ótkizbeýi múmkin. Bul otbasymyz úshin aýyr qaıǵy. Jaqynda qyzym Aqtóbege jeke kýálik alý úshin sýretke túsýge barǵan. Polıseıler “Ákeń qutyldy ma?” dep suraıtyn kórinedi. Bul qyzym úshin qanshama soqqy. Balam Kókshetaýda áskerı boryshyn ótep jatyr. Onyń taǵdyry ne bolady? - dep kúıinedi Samat Qojanıazov.
Ózin lańkester tiziminen kórgen Samat Qojanıazovtyń inisi men jubaıy oblystyq İİD-ne kelgen. Quqyq qorǵaýshylardan keshirim suraýyn talap etipti. Alaıda polıseılerden eki aıdan beri habar almaǵan er adam sotqa júginýge májbúr bolǵan.
-Eki aı kúttim. Birde-bir habarlasqan joq, kelmedi de. Men qarapaıym adammyn. Memleketke, zańǵa baǵynam. Kelip, keshirim surasa, qatelikterin moıyndasa, isti sotqa jetkizbeımin dep oılaǵan edim. 41 jastaǵy inim Sanat ta “Nur Aqtóbedegi” atys kezinde qaıtys bolǵandardyń tiziminde júr. Jaqynda ol ákemizge tıesili dıvıdenti alý úshin Aqtóbedegi Qazposhtaǵa barǵan. Olar “Sender terrorıster tiziminde júrsińder . Anyqtama alý úshin Astanaǵa suranys jiberemiz, kútińder” dep qaıtaryp jiberipti. Qate ketken shyǵar. Almatyda da jaǵdaı ýshyǵyp ketti. Bári tynyshtalsyn dedim. Biraq, shydamnyń da shegi bar. Qansha kútýge bolady?! Jazyqsyz aıyptaýdan keıin júregim kóteriledi. Tek dárimen júremin. Olardyń qolyma meniń terroısterge qatysym joqtyǵyn anyqtaıtyn jazbasha anyqtama berýin talap etemin, - deıdi shaǵymdanýshy.
Budan bólek Samat pen Sanat Qojanıazov jergilikti basylymdardyń birin de sotqa bergen. Aǵaly-inili ekeý ózderi shekken ar azaby úshin árqaısysynan 10 mln teńge moraldyq shyǵyn óndirip berýdi talap etýde.
Esterińizge sala ketelik, 5 maýsym kúni Aqtóbede bolǵan lańkestik oqıǵadan keıin terrorıster tiziminen qate shyqqan. Aǵaıyndy Qojanıazovtardan bólek aqtóbelik Danıar Ýaısov ta ózin óltirilgen sodyrlardyń arasynan taýyp alǵandyǵyn aıtqan edi.
