Memleket basshysy Nursultan Nazarbaevtyń aıtýynsha, Jer reformasy boıynsha qoǵamdyq komısıanyń jumysy barysynda qoǵam kókeıinde júrgen kóptegen máseleler talqylandy. Osynyń nátıjesinde qazirgi zańnamanyń birqatar kemshilikteri anyqtaldy, - dep habarlaıdy Qamshy.kz Baq.kz – ke silteme jasap.
Prezıdent Jer kodesiniń daý týdyrǵan birqatar normalarynyń moratorııin taǵy bes jylǵa, 2021 jyldyń 31 jeltoqsanyna deıin uzartqanyn taǵy bir márte eske saldy.
"Jer reformasy boıynsha qurylǵan komısıa biraz sharýa tyndyrdy. Qoǵamnyń kókeıinde júrgen problemalardy talqylap, buǵan deıin eskerilmeı kelgen kóptegen kemshilikterdi anyqtady. Osyǵan baılanysty birqatar usynystar ázirlendi. Sonyń barlyǵy bólek bir zańda kórinis taýyp, Parlamenttiń qaraýyna engiziledi. Atap aıtqanda, aýyl sharýashylyǵy jerlerin taratý júıesin jetildirý, jerdi utymdy paıdalanýdy baqylaý jáne taǵysyn taǵy. Shyny kerek, bir qolǵa júzdegen myń gektar jerdi birden berip tastaýǵa bolmaıdy. Biz osyny eskermeı keldik. Álem boıynsha ondaı tájirıbe joq. Biz bolsaq, bas kezinde jerdi ońdy-soldy taratýǵa kiristik. Jerdi alǵan árbir adam oǵan jaýap berýi kerek. Jer aýyl sharýashylyǵy salasynda tájirıbesi bar azamattarǵa berilgen jón. Onyń bilimi bar, tájirıbesi bar degendeı. Bizde bolsa, kim kóringenniń bári jerdi alyp aldy. Qazir biz prokýratýra arqyly ol jerlerdi memleketke qaıtaryp jatyrmyz. Sebebi osy ýaqytqa deıin ol jerlerdi qýraı basyp ketti", - dep atap kórsetti N.Nazarbaev Parlament palatalarynyń birlesken otyrysynda.
Memleket basshysynyń aıtýynsha, Úkimet Jer kodeksine ózgerister engizgen kezde aýyl sharýyshylyǵy salasyna qarjy tartýdy kózdedi. Sebebi búginde osy salaǵa quıylyp jatqan búdjet aqshasynyń qaıtarymy tómen bolyp tur. Qaryzdyń kólemi ósip keledi. Kúnderdiń kúninde onyń bári "sabyn kópirshikteri" sıaqty jarylyp, el ekonomıkasyn tyǵyryqqa tireýi ábden múmkin.
"Osyny aldymen túsindirý jumystarynan bastap, artynan zańdy qabyldaǵanda jaǵdaı múldem basqasha bolatyn edi. Agrarlyq sektorǵa qatysty zańnamany qabyldaǵan kezde osy máselelerdi barynsha eskerý kerek",-dedi Prezıdent
