BUU-nyń Qaýipsizdik jónindegi Keńesinde Bas hatshyny saılaý jónindegi daýys berý kezeńi ótkiziledi. Bul shara Reseı Federasıasynyń uıymdaǵy turaqty ókili Vıtalıı Chýrkınniń jetekshiligimen ótedi. Daýys berýdiń tórtinshi kezeńi 9 qyrkúıekke josparlanǵan. Besinshisi 26 qyrkúıekte bolady. Odan keıingi daýys berý kezeńi qazan aıynyń alǵashqy aptasyna belgilengen.
«Bul týraly BUUnyń Qaýipsizdik Keńesiniń basshysy, Jańa Zelandıanyń uıymdaǵy turaqty ókili Djerard van Boheman habarlady» dep jazady, BUU-nyń «Jańalyqtar ortalyǵy». 1 qyrkúıekten bastap Jańa Zelandıa Keńestiń basshysy bop bekitildi. Djerard van Bohemen jýrnalıserdi Keńestiń qyrkúıek aıyna belgilengen josparymen tanystyrdy. Bul aıdaǵy eń basty oqıǵalar: 21 qyrkúıekke belgilengen Keńes músheleriniń Ońtústik Sýdanǵa sapary jáne Bas hatshyny saılaý kezeńi.
Bolashaq Bas hatshyny tańdaý reıtıńisi boıynsha sóz sóılegen Jańa Zelandıa elshisi daýys berý barlyq erejelerge saı ótetinin aıtty. Daýys berý jabyq esik jaǵdaıynda ótpek. Bes turaqty jáne on turaqty emes Keńes múshesine daýys berý úshin birdeı túske ıe búlletender berilmek. Al qazan aıyndaǵy daýys berýde Keńestiń turaqty músheleri men turaqty emes múshelerine beriletin búlletender ártúrli bolady. Jańa Zelandıanyń BUU-daǵy turaqty ókiliniń aıtýynsha, qyrkúıek aıynda onyń ornyna daýys berýdi Reseıdiń turaqty ókili Vıtalıı Chýrkın ótkizedi.
«BUU-nyń Bas hatshysy laýazymyna Jańa Zelandıadan úmitker qatysatyndyqtan men qyrkúıek aıyndaǵy daýys berý sharasyna jetekshilik jasamaımyn» dedi, Djerard van Bohemen.
Qazirgi tańda BUU-nyń Bas hatshysy laýazymyna 10 úmitker tirkelgen. Olardyń altaýy Shyǵys Eýropadan: burynǵy ıýgoslavıalyq Makedonıa Respýblıkasynan Srdján Kerım, Slovenııadan Danılo Túrk, Bolgarıadan Irına Bokova, Moldova Respýblıkasynan Natalá German, Serbıadan Výk Eremıch, Slovakıadan Mıroslav Laıchak. Sondaı-aq bul laýazymnan Antonú Gýterrısh (Portýgalıa) te úmitker bop otyr. Jańa Zelandıalyq Helen Klark, argentınalyq Sýsana Malkorra jáne Kosta-Rıka ókili Krıstıana Fıgeres de saılaýǵa qatyspaq.
BUU-nyń jarǵysyna sáıkes Bas hatshyny Qaýipsizdik Keńesiniń usynysymen Bas Assambleıa taǵaıyndaıdy. Jetpis jyl ishinde uıymǵa segiz Bas hatshy jetekshilik etken. Daýys berý kezeńderi Keńestiń barlyq 15 múshesi bir sheshimge kelgenshe nemese bir úmitkerge Keńes músheleriniń basym bóligi daýys bergenshe jalǵasady.
Esterińizge salaıyq, Pan Gı Mýn — uıym tarıhyndaǵy segizinshi Bas hatshy. Ol Kofı Annannyń ornyn basqan, osy laýazymǵa taǵaıyndalǵan jalǵyz azıalyq azamat. Kofı Annanǵa deıin Bas hatshy qyzmetin
Býtros Býtros-Galı (1992-1996), Haver Peres de Kýelár (1982-1991), Kýrt Valdhaım (1972-1981), Ý Tan (1961-1971), Dag Hammarsheld (1953-1961) Trúgve Lı (1946-1952) atqarǵan.
Sarapshylardyń pikirinshe, BUU-nyń Bas hatshysy laýazymyna Shyǵys Eýropalyq ókil saılanýy múmkin.
Sharafat Jylqybaeva
