Túrkistan qalasyndaǵy ortalyq Esimhan alańynda shahar turǵyndary Rıo olımpıadasynyń kúmis júldegeri Jazıra Japparqul men 19 jastaǵy túrkistandyq palýan Dıdar Hamzany zor qoshemetpen qarsy aldy, - dep habarlaıdy Qamshy.kz QazAqparatqa silteme jasap.
Oblys ákiminiń baspasóz qyzmetiniń habarlaýynsha, baıraqty básekede el namysy úshin synǵa túsken qos sańlaqty aldymen, qala ákimi Á.Óserbaev quttyqtap, qarjylaı syı-syıapat jasady. Sonymen birge, oblystyq máslıhat depýtaty R.Táńirbergenov sóz alyp, kúmis júldeli qyzǵa jeńil avtokóliktiń kiltin saltanatty jaǵdaıda tabys etti.
Erekshe yqylas bildirgen qala jurtshylyǵyna alǵysyn jetkizgen Jazıra Japparqul óz sózinde Túrkistan qalasynyń jastaryn «Á.Nurmahanov atyndaǵy oblystyq olımpıada rezervin daıarlaıtyn sport mektebinen» ashylǵan aýyr atletıka úıirmesine qatysýǵa shaqyrdy.
