Shymkenttik «syra koroli» kelesi apta sot aldynda jaýap beredi. Toqtar Tóleshov pen onyń sybaılastaryna qatysty qylmystyq is boıynsha alǵashqy proses 14-shi qyrkúıekte Astanada ótpek. Taǵylǵan aıyptardyń tizimi de uzaq eken. Tóleshov ekstremısterdi qoldaý, qaraqshylyq, qylmystyq top qurǵan, adamdy zańsyz urlap, kisi óltirgen, bılikti kúshtep basyp almaq boldy degen 16 qylmys boıynsha kúdikke ilinip otyr, - dep habarlaıdy Qamshy.kz KTK arnasyna silteme jasap.
-Búkil eldi dúrliktirgen Tóleshov isine qatysty proseske jýrnalıser tikeleı qatysa almaıdy. Materıalda memlekettik qupıa málimetter kóp bolǵandyqtan otyrys jabyq ótpek. Biraq áskerı sottyń alqa músheleri ár prosesten soń, arnaıy brıfıń uıymdastyryp, aqparat berip otyrmaq.
Tóleshov pen ózge de kúdiktilerge qatysty qylmystyq is sotqa 29-shy tamyz kúni túsken eken. Sýdıa, advokattar men aıyptalýshylar 300 tomǵa arqaý bolǵan tergeýdi nebary bir aptada tanysyp shyqqan. Sóıtip, búgin sotqa deıingi aldyn ala tyńdaý boldy.
Jandos Musabekuly, QR Áskerı soty qylmystyq ister jónindegi sot alqasynyń tóraǵasy:
-Qylmystyq is boıynsha barlyǵy 25 sottalýshy, 16 qorǵaýshy advokat qatysýda. Tóleshovke 16 qylmystyq quqyq buzýshylyq jasaǵany úshin aıyp taǵylaýda.
Tóleshovke taǵylǵan aıyptyń tizimi uzyn-sonar. Shymkenttik kásipker ekstremıstik topty basqarǵan, qaraqshylyqpen aınalysqan, qylmystyq top qurǵan, adamdy zańsyz urlap, kisi óltirgen, bılikti kúshtep basyp almaq bolǵan. «Syra koroli» bankke 200 mıllıon dollar bereshek eken. Tóńkeristi de sol qyrýar qaryzdan qutylý maqsatynda jasaýdy josparlapty. Al qylmystyq top quramynda 5 jyl Bas prokýrordyń orynbasary bolǵan zeınetker İlıas Baqtybaev, Ońtústik Qazaqstan oblysy İshki ister departamentiniń eks-basshysy Ǵıbratýlla Dosqalıev, 35 748 jáne 55652 áskerı bólimderiniń komandırleri bolǵan.
Jandos Musabekuly, QR Áskerı soty qylmystyq ister jónindegi sot alqasynyń tóraǵasy
- Qalǵan 19 sottalýshy Qylmystyq kodekstiń ártúrli babymen aıyptalǵan. Sotqa deıingi tergep-tekserý ýaqytynda 13 sottalýshyǵa qatysty qamaýǵa alyný bultartpaý sharasy qoldanylǵan, qalǵan 12 sottalýshydan eshqaıda ketpeý jáne tıisti minez-qulyqty týraly qolhat alynǵan.
Shymkenttik olıgarh «Ded Hasan», «Jora Tashkentskıı» degen laqap atpen tanymal halyqaralyq qylmystyq toptarmen de tyǵyz baılanysta bolypty. Kásipkerdiń jeke jasaqtap alǵan áskeri de bar. Onysyn jasyrmaı, tipti orys-kazaktarmen birlese parad ótkizgeni este. Tóleshov keıin túrmede de tynysh jatpaı, Saryaǵash qalasynyń 5 myń turǵynyn narazylyqqa shyǵarýǵa tapsyrma bergeni anyqtalǵan bolatyn.
Toǵyz aıdan beri tergeý abaqtysynda jatqan shymkenttik kásipker kelesi aptada sot aldynda jaýap beredi. Alǵashqy otyrys 14-qyrkúıek kúni ótedi. Proses barysynda 104 kýáger tyńdalady jáne 17 jábirlenýshi bar. Al isti «Arqankergendegi» 15 qarýlasyn qyryp salǵan Chelahqqa ómir boıy bas bostandyǵynan aıyrý týraly úkim kesken, talaı generaldy túrmege jibergen sýdıa Erbol Ahmetjanov qarap jatyr.
