Rıo-de-Janeırodaǵy Paralımpıada oıyndarynda júzýden Zúlfıa Ǵabıdýllına altyn medal jeńip aldy, - dep habarlaıdy, -Qamshy.kz tilshisi Qazaqstannyń Paralımpıada ulttyq komıtetiniń baspasóz qyzmetine silteme jasap.
Zúlfıa Ǵabıdýllına 100 metr qashyqtyqqa erkin stılde júzýden álem rekordyn jańartty. Ol álemniń alty dúrkin chempıony jáne Azıa Para oıyndarynyń chempıony, álemniń qola júldegeri. Sportshy álem reıtıńinde úzdik segizdik qatarynda.
8 qyrkúıekte Marakana stadıonynda Rıo-2016 Paralımpıada jazǵy oıyndarynyń ashylý saltanaty bolyp ótken edi. Qazaqstan quramasynan kók baıraǵymyzdy astanalyq júzýshi, halyqaralyq deńgeıdegi sport sheberi, QR absolút chempıony jáne Londondaǵy 2012 jylǵy Paralımpıada oıyndarynyń qatysýshysy Ánýar Ahmetov ustap shyqqan bolatyn.
