Shýlap júrip, premer-mınıstr Kárim Másimovti ornynan aldyq. Biraq, prezıdenttiń bul sheshimin otstavka deýge kele me? Ádette, «otstavka» degende artyna ıt qosyp qýmasa da, atqarǵan jumysyn synap nemese qandaı da bir aıyp taǵyp, qyzmetinen bosatýdy aıtpaı ma? Al, Kárim Másimov premer kreslosyn bosatqanymen ózin osy laýazymǵa taǵaıyndaǵan basshysynan ondaı syn estimedi. Demek, premerdiń qyzmetinen ketýi – onyń biliksizdiginiń belgisi, mınıstrler kabıneti jumysynyń tıimsiz bolǵandyǵynan emes. Já, ary qaraı kettik.
Másimovtiń premerlikten ketýin qoǵam jaman qabyldaǵan joq. Qýanǵan da joq. Oǵan sebep – eldegi yqpaldy qurylymdardyń biri bolyp sanalatyn, atynan at úrketin Ulttyq qaýipsizdik komıtetiniń basshysy bolyp taǵaıyndalýy. Olaı deıtinimiz Kárimniń «KNB-ǵa» barǵanyn quptaǵannan, narazy bolǵandar kóp sıaqty.
Prezıdent qalaı bolǵanda da eshkim kútpegen, eshkimniń oıyna kirip-shyqpaǵan sheshim qabyldady. Bul jerde «Másimov áne ketedi, mine ketedi» dep bal ashqan saıası sarapshylardyń da kinási joq emes. Óıtkeni, premerlikten alynǵan soń onyń qaıda taǵaıyndalýy múmkin ekenine eshkim bas qatyrmady.
Másimovtiń UQK-ge taǵaıyndalǵanyna onyń buryn kóbine qarjy, ekonomıkalyq salada qyzmet etkeni úshin ǵana tańyrqaýǵa bolmaıdy. UQK basshylyǵyna taǵaıyndalǵan «azamattyq» basshy bir Másimov emes. N. Ábiqaevti, M. Tájındi eske túsirińiz.
Sonymen, Kárim Másimovtiń UQK basshylyǵyna taǵaıyndalýynda ne syr bar? Saıasattanýshy Dosym Sátbaev bul taǵaıyndaý Másimov úshin «tómendeý» bolyp sanalmaıtynyn aıtady.
«Birinshiden, bul Másimovtiń karerasyndaǵy debút bolyp otyr. Óıtkeni, bul taǵaıyndaý Qorǵanys mınıstrligine barǵan Imanǵalı Tasmaǵambetovtyń jolyn eske túsiredi. Ekinshiden, ulttyq qaýipsizdik, terorızmmen kúres máseleleri aldyńǵy qatarǵa shyqqan sátte Másimovtiń UQK-ǵa barýy onyń salmaǵyn joǵaltpaǵanyn kórsetedi. Úshinshiden, N. Ábiqaev UQK basshylyǵynan ketken soń vedomstvoaralyq kelispeýshilikter máselesi ózekti bolyp otyr. V. Jumaqanovqa qaraǵanda salmaqty tulǵanyń bul organǵa kelýi atalǵan máselede tártip ornatýy tıis», - dep sanamalaıdy D. Sátbaev.
Búgin Úkimettiń keńeıtilgen jıynyn ótkizgen Elbasy da Másimovtiń UQK-ge taǵaıyndalýyna qatysty pikir bildirdi.
«Úkimette bolyp jatqan ózgeristerdi estip-bilip otyrsyzdar. Onyń óziniń logıkasy bar. Birinshiden, qaýipsizdik máselesi jaǵyn kúsheıtý, nyǵaıtý, deńgeıin kóterý máselesi bar. Odan keıin Kárim Másimovty óziniń kelisimi boıynsha qajetti jerge baryp otyr. Bul qazir óte qajetti bolyp turǵanyn kórip otyrsyzdar. Terorızm, basqa jaǵy da bar. Tájirıbesi bar, respýblıkanyń jaǵdaıyn biledi dep qoıdym», - dedi N.Nazarbaev.
Demek, Prezıdent UQK basshylyǵyna taǵaıyndalǵan K. Másimovten úlken úmit kútip otyr. Ulttyq qaýipsizdik, terrorımz, ekstremızmmen kúrestiń ózekti shaǵynda bul vedomstvoǵa shynymen de saıası salmaǵy bar basshynyń kelgeni de durys. Bul – teris aǵymdardyń qoǵam men memlekettiń ár salasyna yqpal ete alatyn kúshke aınalǵanyn moıyndaý. Olarmen kúreste bir chekısiń áleýeti jetkiliksiz bolatyny da sózsiz.
Elbasy artqan mindetterdi atqaryp, el tynyshtyǵy men ult qaýipsizdigine qater tóndirgen radıkaldardy jónge salýda Kárimniń qarymy qandaı bolmaq? Endigi másele de sol.
Jomart Abdollauly
