Memleket basshysy Nursultan Nazarbaev qazaqstandyqtardy Qurban aıt meıramymen quttyqtady, - dep habarlaıdy Qamshy.kz Aqordanyń baspasóz qyzmetine silteme jasap.

«Qymbatty qazaqstandyqtar! Barshańyzdy qasıetti Qurban aıt meıramymen quttyqtaımyn! Jasampazdyqtyń, izgilik pen meıirbandyqtyń nyshany bolǵan osynaý jarqyn mereke adamdardy qaıyrymdylyq pen janashyrlyqqa úndeıdi.  Ol qazaqstandyqtardyń júregine jaqyndaryna degen súıispenshilik uıalatady, adamgershilik qundylyqtardy nyǵaıta otyryp, kómekke muqtaj jandarǵa qamqorlyq jasaýǵa jeteleıdi jáne rýhanı dástúrlerge baýlıdy.    

Qazaqstan tabysty damyǵan 25 jylda Qurban aıt shyn máninde El birligi men qoǵamdaǵy konfesıaaralyq kelisimdi nyǵaıta túsýge biregeı yqpal etken aıtýly meıramǵa aınaldy.  

Osynaý qasıetti mereke kúnderi árbir otbasyna beıbitshilik pen kelisim, amandyq jáne qut-bereke tileımin!

Shańyraqtaryńyz shattyq pen baqytqa tolsyn!», - delingen Elbasy quttyqtaýynda.