Atyraý qalalyq ákimdigi zańger Ásel Nurǵazıevanyń 17-qyrkúıekte mıtıń ótkizýdi suraǵan aryzyna ruqsat bermedi, - dep habarlaıdy Qamshy.kz Azattyqqa silteme jasap.

«2016 jyldyń 13 qyrkúıegi men 13 qarashasy aralyǵynda Atyraý qalasy aýmaǵynda sanıtarlyq eki aılyq sheńberinde Atyraý qalasyndaǵy Jeńis saıabaǵynyń sheńberinde jáne Qurmanǵazy atyndaǵy mádenıet saraıy mańyndaǵy saıabaqta tazalaý, jóndeý jáne senbilik jumystary josparlanýyna baılanysty 2016 jyldyń 17 qyrkúıeginde mıtıń ótkizýge ruqsat berýden bas tartylsyn»,- dep jazylǵan qala ákimi Serik Shapkenovtyń qoly qoıylǵan qaýlyda.

Azamattyq belsendi Ásel Nurǵazıevanyń aıtýynsha, jer reformasyna qatysty mıtıńten soń qamaýǵa alynǵan Maks Boqaev pen Talǵat Aıan jáne basqa da belsendilerdi qoldap, «Aq jaýlyqty analar» atty 80 adam jınalatyn mıtıń ótkizýge ruqsat suraǵan aryz qala ákimdigine 5-qyrkúıekte tapsyrylǵan.

- Endi sanıtarlyq tazalyq aılyǵyna qatysý úshin 17-qyrkúıekte qala tazalaýǵa atalǵan oryndarǵa barmaqshymyz, - deıdi Ásel Nurǵazıeva.

Atyraý qalalyq máslıhatynyń 2016 jyl 28-naýryzdaǵy №13 sheshimimen Qurmanǵazy atyndaǵy mádenıet saraıynyń janyndaǵy demalys saıabaǵy jáne Jeńis saıabaǵy mıtıń, beıbit sherýler ótetin oryn retinde bekitilgen.