Prezıdent Jarlyǵymen Darıǵa Nazarbaeva QR Parlament Senatynyń depýtaty bolyp taǵaıyndaldy, - dep habarlaıdy Qamshy.kz Aqorda saıtyna silteme jasap.
«Nazarbaeva Darıǵa Nursultanqyzy Qazaqstan Respýblıkasy Parlament Senatynyń depýtaty bolyp taǵaıyndalsyn», - delingen prezıdent Jarlyǵynda.
Sonymen, ótken aptada bıliktiń joǵarǵy satysynda bastalǵan kadrlyq aýys-túıister búgin óziniń logıkalyq shegine jetken sıaqty. 8 qyrkúıek kúni Prezıdent Úkimet basshysy Kárim Másimovti ornynan alyp, UQK basshylyǵyna taǵaıyndasa, 2012 jyldan beri Úkimet jetekshisiniń Birinshi orynbasary laýazymyn atqaryp kelgen Baqytjan Saǵyntaev premer kreslosyna jaıǵasty.
Osy ózgeristerdiń qarsańynda, 5 qyrkúıek kúni Qamshy.kz portalynda «Saǵyntaev Másimovtiń ornyn basyp, Senatqa Darıǵa Nazarbaeva barýy múmkin», - degen boljam maqala jazǵan bolatynbyz. Onda Úkimet quramynda birqatar kadrlyq ózgeristerdiń bolatyny, Elbasy Ózbekstan jaǵdaıynan sabaq alyp, bıliktiń ár tarmaǵyndaǵy yqpaldy núktelerdi senimdi tulǵalarǵa tapsyratyny týraly boljam jasadyq.
Qazaqstan Konstıtýsıasy boıynsha, Senat tóraǵasy - bılik ıerarhıasyndaǵy ekinshi tulǵa. Ata Zańnyń 48-babynda «1. Qazaqstan Respýblıkasynyń Prezıdenti qyzmetinen merziminen buryn bosaǵan nemese ketirilgen, sondaı-aq qaıtys bolǵan jaǵdaıda Respýblıka Prezıdentiniń ókilettigi qalǵan merzimge Parlament Senatynyń Tóraǵasyna kóshedi» delingen.
Bul jerde Senat tóraǵalyǵy týraly áńgimeni de bekerge qozǵap otyrǵan joqpyz. Darıǵa Nursultanqyzy Senatqa beker barmady. Qazirgi spıker Qasym-Jomart Toqaev zeınet jasyna jetkenin eskersek, ol aldaǵy otyrystardyń birinde laýazymyn ótkizýi múmkin. Al, Senat depýtattary «QR Parlamenti jáne onyń depýtattarynyń mártebesi týraly» Zańǵa saı tóraǵalyqqa Darıǵa Nazarbaevanyń kandıdatýrasy usynylsa, qarsy kele qoımas.
