Qaırat Nurtas Vlast.kz basylymyna bergen suhbatynda qytaı tilin qaıdan úırengendigin, ne sebepti saıasatker bolýdan bas tartqanyn, anasynyń óz ómirinde qandaı ról oınaıtynyn, Omsk jýrnalıserimen arazdasýynyń sebebin, ákesi kómektesken 500 adamnyń kim ekenin aıtyp berdi,- dep habarlaıdy Qamshy.kz Stan.kz silteme jasap. Munymen qatar, aldaǵy josparlaryn bólisip, Astanadan talantty balalarǵa arnalǵan mektep ashqysy keletinin jetkizdi.

“Aýyldy aımaqtarǵa jıi baramyn. Ol jaqtan bizden de myqty talantty ánshilerdi kezdestiremin. Ókinishke oraı, olar biz sekildi qoldaýshylary bolmaǵan soń jerde qalyp qoıǵan. Mine, dál osyndaı talantty jandardy bir mádenı oshaqtyń astyna jınaǵym keledi. Osy kúnge deıin esh jerde aıtpaǵan edim.

Sizdergi alǵash ret syrymdy ashyp otyrmyn. Jýyrda Astanada Qaırat Nurtas mektebi ashylmaq. Ol jerde balalarǵa arnalǵan úıirmeler, án jazý stýdıalary men ánder týraly aqparattar bolady. Tipti beınebaıan túsirýge arnalǵan arnaıy bólme bolady. Bolashaǵynan úmit kúttiretin jastardy shaqyrǵym keledi. Bul shamamen Tımatıdiń “Black star” jobasy sekildi bolmaq”, – deıdi Qaırat Nurtas.

Kúni keshe Qaırat Nurtas Qazaqstanda tek qazaq tilinde sóılegisi keletindigin aıtqan bolatyn.  Munymen qatar, ol ózge tilde sóıleı tura Qazaqstannyń nanyn jep júrgen jandardan uıalýdy surady.

“Óziniń týǵan tilin bilmeıtin qazaq baýyrlaryma aıtarym bar. Muny maǵan deıin de qurmetti “aǵalarymyz” aıtqan bolatyn. Týǵan tilderińizdi bilmeı turyp, Qazaqstanda nandaryńyzdy taýyp júrgenderińiz uıat bolar”, – deıdi ol.