Almatydaǵy tergeý abaqtysynda zorlanǵan Natalá Slekıshına advokatynan bas tartty! Sot aıaqtalýǵa jaqyn qalǵanda kelinshek qorǵaýshynyń qyzmetine muqtaj emespin dep túrmeden qaǵaz jibergen. Alaıda advokat, abaqty qyzmetkerleri buǵan áıeldi ádeıi májbúrlegen deıdi. Óıtkeni ol sońǵy ret jolyqqanda, Slekıshınanyń beti kógergenin baıqaǵan, - dep habarlaıdy Qamshy.kz KTK arnasyna silteme jasap.
Temir tordyń ar jaǵynda ózine jábir kórsetkendermen Slekıshına endi jalǵyz ózi kúrespek. Ol túrmeden sotqa advokattan bas tartamyn dep ótinish túsirtken. Muny estigen advokaty mán-jaıyn bilý úshin áıelge birden barǵan eken. Biraq, sondaǵy kórgeni – jaǵasyn ustatypty.
Aıman Omarova, advokat:
-Betine kremdi qabat-qabat qylyp jaǵyp alǵan. «Aıman Muratqyzy, men sizge aıtyp edim ǵoı» dedi. «Meni solaı májbúrlep jatyr, men sol úshin sizdi jańaǵydaı aıtamyn advokat maǵan kerek joq» dedi.
Soty aıaqtalýǵa jaqyn qalǵanda bulaı bas tartýy qısynsyz deıdi advotkat. Óıtkeni sońǵy kýágerler sotta salmaqty sóılegen. Al endi Slekıshınanyń qara basyn qalǵanyn paıdalanyp, qarsy tarap istegi bar aıǵaqty joqqa shyǵarýy múmkin.
Aıman Omarova, advokat:
-«Dálelder joq» dep prokýrorlar da aıtyp jatyr. Qalaı dálelder joq? Zańsyz telefonyn tyńdaǵan. «Men jalǵyz basyma alamyn»dep tur Hakımov,- «al sender bolsańdar tóleısińder» dep tur. «Sen bir aı tóleısiń, sen bir aı tóleısiń, sen bir aı.» Tóleıtin ol – Hamrakýlov, Isaev, Muhamedjanov.
Biraq, bulardyń bári endi jazadan qutylyp ketýi múmkin. Qazirdiń ózinde úsh qyzmetker tergeýden bosatylǵan. Esterińizge salsaq, qazir jazasyn ótep jatqan 32 jastaǵy Natalá Slekıshına tergeý qapasynyń tórt birdeı qyzmetkeri zorlady dep shaǵymdanǵan edi. Biraq qazir sot aldynda bireýi ǵana jaýap berip jatyr. Ol túrmede týylǵan sábıdiń ákesi dep tanylǵan maıor Rýslan Hakımov. Qalǵany tek kýáger retinde qatysýda. Dese de, prosesten aıaqasty alastatylǵan advokat báribir de isti orta jolda qaldyrmaımyn dep otyr.
-Erteń kezekti sot prosesi. Onda jaryssózge kelinshektiń ózi túsedi. Eshqandaı zańgerlik bilimi joq Slekıshınanyń ózin-ózi qalaı qorǵaıtyny ázirge belgisiz. Óıkeni, oǵan saqadaı saı daıyndyq kerek. Al ol qazir jazasyn ótep jatqan jerde ondaı jaǵdaıdyń jasalýy ekitalaı.
