Atyraýda 8-synyp oqýshysy Aqerke Amanjan mektepke baryp oqı almaı júr. Sebebi din jolynda júrgen mektep oqýshysy basyndaǵy oramalyna baılanysty sabaqqa qatystyrylmaǵan. Aqerkeniń ata-anasynyń aıtýynsha balıǵat jasyna jetken balalary sharıǵat boıynsha oramal taǵyp júrýi kerek. Al mektep muǵalimderi bolsa oramal tartqan oqýshyny mınıstrliktiń nusqaýy boıynsha sabaqqa qatystyra almaımyz dep otyr, - dep habarlaıdy Qamshy.kz 31 arnaǵa silteme jasap.
Atyraýlyq Aqerke Maqsotqyzy bıyl 8-synypqa barýy kerek bolǵan. Alaıda balıǵat jasyna tolǵan qyzymyzdyń oramal tartýy sol edi, mekteptegi oqýyn jalǵastyra almaı qaldy, - deıdi ata-anasy. Naqtysy, muǵalimder oramalyńdy sheship kel dep sabaqqa kirgizbeı qoıǵan aıtýylarynsha.
AQERKE AMANJAN, 8-synyp oqýshysy:
- Meniń oramalyma baılanysty, sabaqqa dırektorym kirgizbeı jatyr. Men basqalar sıaqty mektepke oqyǵym keledi. Sabaq úlgerimim jaqsy, 4-5 oqımyn. Sabaqta dostarymdy kórgim keledi. Qatarlastarym sıaqty sabaqqa barǵym keledi. Endi dırektor men muǵalimderdiń oramalmen kirgizýin qalaımyn.
Aqerkeniń ata-anasy da qyzdary mektep formasyna saı kıingen, tek ereksheligi basyna oramal tartqandyǵy deıdi.
MAQSOT İZBASAROV, Aqerkeniń ákesi:
- Sharıǵat boıynsha bas kıim kıip júrý kerek qoı. Ózimiz namaz oqıtyn musylman bolǵannan keıin solaı bas kiıimmen mektepke kirýin talap etip otyrmyz. Qyrkúıektiń birinen bastap baryp júrmiz mektepke, esik aldynan kirgizbeıdi, qaıtaryp jiberedi. Klasyna da kirgizip jiberdik, klass jetekshisi shyǵaryp jiberedi.
Al Aqerke oqyp kelgen №21 mektep ustazdary nusqaýlyqqa baılanysty talap etildi deıdi.
BALQASH JAQSIEVA,№21 mektep dırektorynyń tárbıe isi jónindegi orynbasary:
- Biz mektepke kirgizbeı otyrǵan joqpyz, tek qana mekteptiń tabaldyryǵyna deıin oramalyńdy taǵyp kel, sodan keıin ishke kirerde oramalyńdy salǵyzyp, ishtegi balalarmen birdeı bolyp otyrsyn degen talap qoıǵanbyz. Ony ata-ana durys túsinbeı otyr. Biz nusqaýlyqqa baılanysty óz jumysymyzdy atqaryp otyrmyz, ishki tártibimizdi ustanyp otyrmyz.
Mınıstrlikten kelgen nusqaýlyq pen mektepishilik buıryqqa saı jumys jasap otyrmyz degen mektep muǵalimi Aqerkeniń jaqsy oqýshy ekendigin moıyndaıdy. Tek mektep ishinde oramalsyz júrýine ata-anasy qarsy bolmasa eken degendi aıtady. Óıtkeni, zaıyrly memlekette zań barshaǵa ortaq.
