Turmystyq zorlyq-zombylyqty bastan keshken tanymal prodúser Baıan Esentaeva beıimdelý ortalyqtaryna ózi júginýi kerek bolǵan. Bul týraly QR Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıa basqarýshysynyń orynbasary Elena Tarasenko habarlady. Bul týraly Qamshy.kz inform.kz silteme jasap habarlaıdy.
Esterińizge sala ketsek, 10 maýsymda oryn alǵan oqıǵa boıynsha bergen alǵashqy suhbatynda Baıan Esentaeva áıelder uıymynyń birde-biri habarlasyp, kómek qolyn sozbaǵanyn aıtyp, mundaı ortalyqtardyń álsiz jumysyna meńzedi. Osy sebepti prodúser áıelder turmystyq zorlyq-zombylyqtan qorǵaý uıymyn qurmaq.
«Árıne, mundaı jaǵdaıda uıym emes, zábir kórgen áıeldiń ózi habarlasýy kerek. Biraq atalǵan uıymdardyń bizde az ekenin moıyndaımyn. Sońǵy jyldary jaǵdaı aıtarlyqtaı túzelip keledi. Dese de ol azdyq etedi. Zábir kórgen adam, ol áıel ǵana emes, bala da, er-azamat ta bolýy múmkin, beıimdelý ortalyqtaryna júgingende, olar jetkilikti deńgeıde qyzmet atqarmaıdy (…) Biraq munda óz ustanymyńdy qorǵaýdan qoryqpaý qajet. Sondyqtan Ulttyq komısıa bul salada jumys jasaıtyn qoǵamdyq birlestikterdi de, memlekettik qurylymdardy da qoldaıdy. Meniń oıymsha, bizge bul jumysty jalǵastyrý aýadaı qajet», – deıdi Elena Tarasenko.
Densaýlyq saqtaý jáne áleýmettik qorǵaý vıse-mınıstri Svetlana Jaqypovanyń málimeti boıynsha, memlekette 32 daǵdarys ortalyǵy, 17 baspana bar. Byltyrǵy jyl boıynsha memlekettik uıymdarǵa 4,6 myń áıel júgingen. Al memlekettik emes uıymdardan kómek suraǵan áıelder sany 11 myńdy quraıdy.
Sonymen qatar Elena Tarsenko áıelderdi turmystyq zorlyq-zombylyqtan qorǵaıtyn zań normalarynyń basym kópshiligi Qazaqstanda jumys istemeıtinin atap ótti. Sol sebepti bul salaǵa qatysty zańnama Qazaqstan Respýblıkasyndaǵy otbasylyq jáne genderlik saıasat tujyrymdama aıasynda 2030 jylǵa deıin jetildirile túspek. Tujyrymdama jobasy búgin Astanada ótken dóńgelek ústel barysynda talqylandy.
«Biz búginde aldyn-alý is-sharalarynyń jetkiliksizdigin, áıel men balany qorǵaıtyn qyzmetterdiń jetkilikti túrde damymaǵanyn túsinemiz. Tipti, zábir kórsetýshini páterden shyǵarý syndy qabyldanǵan normalar da… Bul norma páterden shyǵarylýy tıis erkektiń odan bólek baspanasy bolýy kerektigi jónindegi eskertpege baılanysty tolyq jumys istemeıdi. Biz bul normany Parlamentte talqylaǵan kezde páterden ýaqytsha shyǵarý boıynsha norma qabyldasaq, adam quqyǵyn buzatynymyz týrasynda sóz ettik. Sondyqtan biz jańa Tujyrymdamada turmystyq zorlyq-zombylyq salasyndaǵy zańnama kemeldene túsedi dep bilemiz», – deıdi Elena Tarasenko.
Aıta ketsek, burynǵy jubaıyn soqqyǵa jyǵyp, birneshe márte pyshaqtaǵan Baqytbek Esentaevtyń isi boıynsha aldyn-ala tyńdaý 14 qyrkúıekte Qaskeleń qalalyq okrýgindegi Almaty oblysy Qarasaı aýdandyq mamandandyrylǵan sotynda bastaldy. Baıan Esentaevanyń ózi alǵashqy otyrysqa kelmegen. Úlken qyzy Aısáýle Baqytbek sotta ákesin jaqtamaq.
