Pavlodar oblysynyń Ertis aýdanyna qarasty Qyzylqaq aýyly turǵyndary polısıa qyzmetkerleriniń zańsyz áreketine shaǵym aıtyp, narazylyq bildirdi, - dep habarlaıdy Qamshy.kz Habar24 arnasyna silteme jasap.
Turǵyndardyń aıtýynsha, shuǵyl áreket etý jasaǵy aryz ıelerin jappaı sabaǵan. Jábirlenýshilerdiń arasynda 15 jastaǵy jasóspirim de bar. İİD-niń jedel áreket etý toby tún aýǵan shaqta aýylǵa kelip, tergeý jumystaryn júrgizse kerek. Al, Uıymdasqan qylmysqa qarsy kúres basqarmasy "polısıaǵa qarsy shyqqan jaǵdaıda kúsh qoldaný erejelesi bar" ekenin alǵa tartyp otyr. Tártip saqshylarynan taıaq jegen aýyl turǵyndarynyń biri - jylqyshy Erbol Qabylbekov. Qurban aıtqa shaqyrǵan aýyldasynyń úıine qonaqqa bara jatqan jolda taıaq jepti. Aıtýynsha arnaıy forma kıgen adamdar er-azamattardy uryp soqqan. Qazir mıy shaıqalyp, qabyrǵasy synyp aýrýhanada jatyr.
Erbol Qabylbekov, jábirlenýshi:
- Endi men aıtqa bara jatqan jerimnen qonaqqa, motosıklmen kele jatyp ustap aldy. Túse sala tepkiledi. Qolmen de urdy. Sosyn jatqyzyp qoıyp urdy. Dáriger keldi sosyn úıge alyp ketti.
Búgin taǵy 4 aýyl turǵyny dárigerlerdiń kómegine júginipti. Ákesin uryp jatqandarǵa toıtarys berem dep jábir kórgen on bes jasar Temirlan Ahmetovtiń keýde qýysyna zaqym kelgen.
Temirlan Ahmetov, jábirlenýshi:
- Men mektepten kele jattym. Kóshede ákemdi uryp jatyr. ne istep jatyrsyńdar desem meni myna jerimnen bir perip qulatty, teýip saldy. Úsheýi maskada boldy, avtomatpen.
Áýsen Álkeev, Ertis aýdandyq aýrýhanasynyń hırýrgi:
- Jalpy naýqastar Qyzylqaq aýylynan keldi. Jábirlenýshi 5 naýqas bolǵan. Onyń biri aýrýhanaǵa jatqyzyldy. Sol jaǵynan segizinshi qabyrǵasy synǵan.
Aýyl ımamy, tarıh pániniń muǵalimi, kásipker, mektep oqýshysy uzyn sany 11 adam zardap shekken. Shuǵyl áreket etý tobymen uıymdasqan qylmysqa qarsy kúres bólimi Qyzylqaq aýylyna artemıa-salına shaıandaryn aýlaıtyn kóldi kúzetýge barǵan. Turǵyndar tuzdy kólden qundy jándikterdi aýlaýǵa bolmaıtynyn bilse de, bul jerdi kásipke aınaldyrǵan. Qansha ret eskertilgenmen aýyldyqtar bul ádetin qoımapty. Polısıaǵa qarsy shyǵyp, zańǵa baǵynbaǵan soń osyndaı jaǵdaıǵa bardyq dep otyr.
Narıman Álıev, oblystyq İİD uıymdasqan qylmysqa qarsy kúres bóliminiń basshysy:
- Qyzmetkerler «Quqyq qorǵaý jóninde» qoldanystaǵy zań boıynsha áreket jasady. Onda qandaı da bir oqıǵa bolǵanda kúsh qoldanýǵa bolady delingen. Bul jaǵdaıda bizdiń qyzmetkerler sambony qoldandy.
Qazir osy oqıǵa boıynsha qylmystyq kodekstiń 362 babymen qyzmettik ókilittigin asyra paıdalaný deregi boıynsha qylmystyq is qozǵalyp, tergeý jumystary bastalyp ketti.
