Ulttyq ekonomıka mınıstrliginiń habarlaýynsha 2017 jyly Ulttyq qordan alynatyn transfertter qor kirisinen 1,4 trıllıon tteńgege artpaq. Ulttyq qordyń aktıvteri 2019 jyly 63,4 mlrd dollardan (2015 jylǵy kórsetkish) 50,7 mlrd dollarǵa deıin qysqarmaq, - dep habarlaıdy Qamshy.kz.

Úkimet áli de Ulttyq qordan alynatyn transfertter kólemin saqtaýǵa májbúr bolyp otyr.

«Munaı baǵasynyń tómendeýi kezeńinde Ulttyq qordy saqtap qalý mańyzdy. Biraq, ázirge bazalyq boljamdar boıynsha Ulttyq qordan alynatyn transfertter kólemi onyń kirisiniń kóleminen artyq bolady. Osyǵan baılanysty biz 2018 jyldan bastap Ulttyq qordan alynatyn qarajatty qysqartamyz. Qazirgi ýaqytta biz Ulttyq qor qarajatyn basqarý tujyrymdasasyn ázirlep jatyrmyz, ol osy jyldyń aıaǵyna deıin daıarlanyp, Úkimet qaraýyna usynylady», - degen bolatyn Májilistegi Úkimet saǵatynda Ulttyq ekonomıka mınıstri Qýandyq Bishimbaev.

Mınıstr sondaı-aq, 2016 jylǵy 1 qyrkúıektegi jaǵdaı boıynsha eldiń halyqaralyq rezervteri jyl basynan beri 4,6 paıyzǵa ósip, 95,6 mıllıard dollardy qurasa, Ulttyq qor aktıvteri 2,1 paıyzǵa ósip 64,9 mıllıard dollarǵa jetkenin de aıtty.

Depýtattar bolsa, Ulttyq qor qarajatyn saqtap qalý úshin ekonomıkanyń ishki múmkindikterin paıdalanyp, jeke ınvestısıalar men kásipkerlikti damytýǵa kóńil bólý kerektigin aıtyp otyr.

Buǵan deıin portalymyzda Qazaqstannyń syrtqy qaryzy sońǵy tórt jylda segiz ese óskeni týraly jazǵan bolatynbyz.