Elimiz táýelsizdigin alyp, ulttyǵyn ulyqtap, joǵyn túgendep, joǵaltqanyn qaıta taba bastaǵan jyldary osy eldik maqsattardy júzege asyratyn ulttyq basylymdar da jaryq kóre bastady. Onyń biri, ári biregeıi, halyqtyq múdde men eldik muratty tý etip ustaǵan aptalyq "Túrkistan" gazeti edi. 1994 jyldyń 28 qańtarynda 4 bet qana bolyp shyqqan "Túrkistan" gazeti qazirgi tańda qazaq aqparat aıdynan oıyp oryn alar pármendi basylymǵa aınaldy.
Basylymnyń alǵashqy belesteri týraly belgili jýrnalıs Kólbaı Adyrbekuly bylaısha eske alady: «Zaman-Qazaqstan» gazeti bergen ýádelerin oryndamaǵannan keıin, jazýshy, dramatýrg Qaltaı Muhamedjanov onyń ornyna «Túrkistan» gazetin ashty. Bul halyqaralyq gazet boldy. Qaltaı Muhamedjanov eń qıyn kezeńderde, táýelsizdiktiń alǵashqy jyldarynda, qarjynyń tapshy kezinde gazetti shyǵaryp otyrdy. Sol kezdegi gazet qyzmetkerleri de aılap jalaqy almasa da, gazetti shyǵardy. Bul til úshin kúres boldy. Táýelsiz eldiń múddesi úshin kúres boldy. Osynyń báriniń basshylyǵynda Qalekeń turdy. «Túrkistan» gazeti qazir irgeli gazettiń birine aınaldy. Óz oqyrmandaryn tapty. Bunda qoǵamdyq ómirdiń barlyq salasy qamtylady: ekonomıka, tarıh, saıasat, din, óner. Din, tarıh, máselesindegi ol kisiniń pýblısısıkalyq shyǵarmalary oqyrmandar kókeıinen shyǵyp otyrdy. Ásirese, ótken ǵasyrdyń 90-shy jyldarynyń sońynda elimizde óte tolǵaqty máselelerdiń birine arnalǵan kóshi-qon problemasyna arnap, arnaıy «Qonys» qosymshasyn júrgizýdi qolǵa aldy. Qosymshanyń redaktory Aıtan Núsiphan Qazaqstannyń kóshi-qon salasyndaǵy irgeli saıasatynyń qalyptasýy jaıynda kóp problemalardy sóz etti,- deıdi (http://www.turkystan.kz/kz/articles/view/40983)
Rasynda, "Túrkistan" gazeti negizi qalanǵan alǵashqy jyldardan bastap, kúni búginge memlekettiń qalyptasýy men qazaq rýhanıatynyń jandanýyna eńbek etip keledi. Gazet betinde qanshama shetendi, kúrmeýi qıyn problemalar jazyldy, eldiń tizginin ustaǵan azamattarmen birge qoǵamdyq máseleler talqylandy. Halqymyzdyń dańqty perzentteri "Túrkistan" arqyly qazaq qoǵamyna jańa qyrynan tanyldy. "Túrkistan" gazeti Mustafa Shoqaıdyń "Túrkistan" ıdeıasynyń atyn óshirmeı, búginge deıin jetkizdi. Túrki jurtynyń qara shańyraǵy - Qazaqstannyń basty basylymdarynyń birine aınaldy.
Bıyl "Túrkistannyń" jaryq kóre bastaǵanyna 20 jyl tolyp otyr. Basylymdy mereıtoıymen "Qamshy" portaly redaksıasy atynan quttyqtaı otyryp, "Túrkistan" ujymyna tek shyǵarmashylyq shabyt, telegeı tabys, eren eńbekterińiz jemisti bolsyn dep tileımiz!
