Búgin Qyrǵyzstan prezıdenti Almazbek Atambaevtyń densaýlyǵy syr berip, Nú-Iorkte ótetin BUU Bas assambleıasy sesıasyna barar jolda Túrkıanyń aýrýhanasyna jatqyzylǵany habarlandy. Osy oraıda Almazbek Atambaevtyń dárigerler kómegine júginip, eldi eleń etkizýi bir bul emestigin esterińizge salamyz. Qamshy.kz osy ýaqytqa deıingi Almazbek Atambaevtyń ýlandy degen kúdikpen emdelý tarıhyn tizip shyqty.
Atambaev – prezıdent atanbaı turyp, saıası qarsylastarynyń shabýylyna ushyraǵan saıasatker. Eń alǵash ret ol 2007 jyldyń 11 mamyry kúni ýlandy. Ol kezde Almazbek Qyrǵyzstannyń premer-mınıstri edi. Atambaev onda óziniń sol kezdegi el prezıdenti Qurmanbek Bakıev pen onyń ákimshilik jetekshisi Medet Sadyrqulovpen kezdesýden soń bir staqan shyryn ishkenin, artynsha esinen tanyp qalǵanyn aıtqan. A. Atambaev 17 mamyr kúni AQSH elshisi Marı Iovanovıchke ózine berilgen ýdyń reseılik ekenine jáne onyń ózin óltirý úshin emes, tek eskertý jasaý, qorqytý jasaý úshin berilgenine senimdi ekenin aıtypty. Sondaı-aq, A. Atambaev sol oqıǵadan soń reseılik FQQ-ge qońyraý shalyp, ózine qarsy eshteńe jasamaýlaryn surap, óziniń «reseıshil premer-mınıstr ekenin» aıtqanyn da ashyq málimdegen.
Ózin ýlaýǵa qatysy bar basty kúdiktiler retinde A. Atambaev Qyrǵyzstannyń burynǵy premer-mınıstri Felıks Kýlov pen Qazaqstan prezıdentiniń sol kezdegi kúıeý balalarynyń bireýin ataǵan. Bul áńgimeni olan ári daýryqtyrýdy qalamaǵan A. Atambaev Túrkıanyń «Gúlhan» áskerı-medısınalyq akademıasynda emdelip, keıin óńeshin tazalatqan.
Qyrǵyzstandaǵy 2009 jylǵy prezıdent saılaýy kezinde de Atambaev ýlandy degen shý shyqty. Maýsym aıynyń sońynda kezekti bir jıynda ol «boıyn ıgerýi qıyndap, sóıleı almaı» qalǵan. Ol jolǵy ýlanýǵa júıke-paralıchtik ý sebep bolǵany habarlanǵan edi.
2011 jyldyń kúzinde ótken prezıdenttik saılaýda A. Atambaev jeńiske jetip, 1 jeltoqsan kúni ınaýgrasıasy ótken bolatyn. Osydan keıin de Atambaevtyń densaýlyq jaǵdaıyna qatysty túrli alyp-qashpa áńgimeler aıtyldy. Tek 2013 jyly qaıtadan Túrkıanyń sol kezdegi prezıdenti Abdolla Gúldiń shaqyrýymen «Gúlhana» áskerı-medısınalyq akademıasynda em alǵanyn bilemiz.
Odan bólek A. Atambaev 2014 jyly Máskeýdegi klınıkalardyń birinde tizesine ota jasatty. 2015 jyly qarasha aıynda birqatar BAQ A. Atambaevtyń Beıjińge baryp emdelgeni týraly jazdy. Biraq, bul aqparat resmı organdar tarapynan rastalmady.
Qyrǵyzstannyń A. Atambaevqa deıingi prezıdentteriniń ýlanýy týraly ashyq aqparattar taraǵan joq. Tek, eks-prezıdent Qurmanbek Bákıevtiń otbasylyq kmkiljiń kezinde týǵan uly Maksım Bákıevtiń aıaǵynan atyp jaraqattaǵany týraly WikiLeaks jazdy.
Daıyndaǵan: Darhan Muqantegi
