Almaty aýrýhanasynda qaıtys bolǵan 6 jasar búldirshinniń anasy perzentiniń jumbaq ólimine dárigerlerdi kinálaýda. Iolanta Ianýsheneniń aıtýynsha, onyń ishi aýyryp barǵan qyzy Evelınaǵa aq halattylar ártúrli dıagnoz qoıyp, ári-beri sabyltyp qoıǵan. Al sońynda soqyrishekke ota jasap, 4 saǵattan keıin búldirshinniń óli denesin qaıtarypty, – dep habarlaıdy Qamshy.kz KTK arnasyna silteme jasap.

Páter toly oıynshyqtar endi ıesiz qaldy. Olarmen oınaıtyn Evelına 2 kún buryn jer qoınyna tapsyrylǵan. Al kúni keshe mektep tabaldyryǵyn attaǵan jalǵyz qyzynyń ólimine anasy áli sene almaı júr. Sebebi, perzenti  buǵan deıin qaterli dertpen aýyrǵan emes. Tek bir apta buryn ystyǵy kóterilip, ishi aýyra bastapty.

“Mazasy kete bastaǵan soń aýrýhanaǵa ózim apardym. Dárigerler soqyrishegin tekserdi. Sóıtip, ol jeri durys dep, juqpaly aýrýlar aýrýhanasyna jiberdi. Ondaǵy mamandar qyzymnyń tamaq bezi isingenin málimdedi. Sóıtip, angınanyń emin úıde qabyldaı bastadyq”, – deıdi Evelına Ianýshaıteniń anasy Iolanta Ianýshene.

Alaıda Evelınanyń tamaǵy emes, ishi aýyra beripti. Al 3 kún buryn jaǵdaıy tipten nasharlap, jedel járdemmen aýrýhanaǵa jetkizilgen. Sóıtip, dárigerler taǵy da soqyrishek bolǵan dep, naýqas qyz birden pyshaqqa túsipti. Tek 4 saǵattan keıin óli denesi qaıtarylǵan. Endi operasıa ústinde kóz jumǵan qyzdyń anasy bolǵan jaǵdaıǵa dárigerlerdi kinálap otyr.

“Negizi otanyń jetinshi mınýtynda kóz jumǵan. Al dárigerler qaraly habardy 4 saǵattan keıin jetkizdi. Osy ýaqyt boıy qatelikterin jabýǵa tyrysqany anyq. Sebebi, olar ota aldynda qyzymnyń aǵzasyn teksergen joq. Meniń oıymsha, qyzym artyq mólsherdegi narkozdan nemese salynǵan dári-dármekterge alergıadan kóz jumdy”, – deıdi Iolanta Ianýshene. Ota soqyrishekke jasalǵanymen, sońynda naýqastyń ókpesi qabynǵan bolyp shyqqan. Degenmen, dárigerler ózderinen eshqandaı aǵattyq ketpegenin málimdedi.

“Mamandar durys dıagnoz qoıǵan. Naýqastyń ish qýysy qatty aýyrǵanda biz ota arqyly, sebebin anyqtaýǵa mindettimiz. Naýqastyń neden kóz jumǵanyn máıitke jasalǵan zertteý kórsetedi. Sony kúteıik”, – deıdi Almaty qalasy №1 balalar klınıkasy bas dárigeriniń orynbasary Nıkolaı Dáchenko. Al qara jamylǵan áıel perzentin aýrýhanaǵa aparǵany úshin ókinip qalǵan. Dárigerlerden kóńili qalǵan ol endi shyndyqqa qol jetkizbek. Sondyqtan Evelınanyń ólimine kinálilerdi jazalaý úshin prokýratýraǵa shaǵymdanbaq.