Uzyndyǵy 7 jarym metr bolatyn ámbebap áýe kóligi «Araı» dep atalady. Ushaqqa kánigi mamandardyń ózi joǵary baǵa berip otyr. Ásirise tehnıkalyq erekshelikteri men basqarý júıesine. Kópshilikke tanystyryla salysymen “Araı”-dy satyp alýǵa nıet qylǵan sheteldikter de tabyldy.
Sheteldiń áýe kólikterine kúni qaraǵan qazaq jurtynyń bul búgingi maqtanyshy. Kún astyndaǵy “Araıǵa” bul kúni tamsanbaǵan jan joq. Búıirinde Qazaqstanda jasalǵan dep jazylǵan. Qyzyqtaýǵa kelgender úshin qozǵaltqyshy tań atysy, kesh batysy toqtaýsyz otalyp tur. Óz salmaǵy 546 keli, soǵan qaramastan 590 kelilik júkti kóterip kete beredi eken. Endi aty máshhúr AN-2 ushaǵyn naryqtan syryp tastaıdy dedi biletinder. Qarapaıym mysal, AN-2 saǵatyna 300 lıtr janarmaıdy jutsa, bul bar-joǵy 35 lıtr benzın jaǵady.
Dýman Aqtaev, bas ınjener:
-Qazirgi jasalǵan ushaq avıahım jumystarǵa arnalǵan. Ýnıversaldyq samoletti jarty saǵattyń ishinde qaıtadan pasajırlikke qaıtarýǵa bolady. Baktarynda bárin alyp tastaýǵa bolady, bir ushaqtyń baǵasy 200 myń dollar.
Egistikti dárileýge, shekarany kúzetýge, kez kelgen aýmaqty áýeden baqylaýǵa taptyrmas tehnıkanyń ushýyna 70 metr, qonýyna 90 metr qashyqtyq jetip jatyr. Jer túzý bolsa boldy. Bul osymen bizdiń mamandar qurastyrǵan tórtinshi ushaq. Úsheýi qazir Soltústik Qazaqstanda qyzmette kórinedi. 4200 metr bıiktikke deıin kóteriletin “Araıdyń” qabiletine ushqysh ta dán rıza.
Vladımır Ansýpov, ushqysh:
- Bul ushaqtyń qanattary uzarǵan, jerden neǵurlym bıiktegen. Aldyńǵy úsh ushaqtan góri áldeqaıda senimdi ári jyldam. Áýede kez kelgen buıryqty tehnıkalyq turǵyda kedergisiz oryndaıdy. Bul ózi tektes áýe kólikteriniń ishinde eń myqtysy, muny maman retinde aıta alam.
Elimizde qazir egin salýmen aınalysatyn myńdaǵan sharýashylyq bar. Solarǵa taptyrmas qural bolmaq. Óıtkeni 25 paıyz aqysyn tólep qalǵanyn nesıege alsa bolady.
-Qazaq eli ushaq shyǵarady degendi estigende alys-jaqyn sheteldiń tańdanyp tańdaı qaqqany aıtpasa da túsinikti. Sodan bolar búgingi synaqtyq ushý alańyna ózimizdiń jáne ózge eldiń tisqaqqan mamandarynyń tórt kózi túgel jınalypty. Eger aýzy-murnynan shyǵaryp janarmaı quısańyz 1200 shaqyrymdy toqtaýsyz baǵyndyratyn bul otandyq áýe kóligi qazir tapsyrys berýshilerin kútip tur. Eger naqty tapsyrys tússe mamandar bul ushaqty 3 aıdyń ishinde qurastyryp berýge múddeli.
"Ktk" arnasy
