Qazir jeke kásibimdi dóńgeletem, óz betimmen tirlik qylam degenge múmkindik kóp. Eńbek etkisi kelgen azamattyń qoltyǵynan demeýge, aıaǵynan tik turyp ketkenshe qoldaý kórsetýge memleket qashan da ázir. Ásirese, «Bıznestiń jol kartasy-2020» memlekettik baǵdarlamasy aıasynda jas kásipkerlerge berilgen jeńildik kóp. Alaıda túsindirý jumystarynyń kemshindigi óz kásibin ashqysy keletin azamattardyń túrli qatelikterge boı aldyrýyna sebep. «Nur Otan» partıasynyń qoǵamdyq qabyldaýlary osy olqylyqtyń ornyn toltyrýǵa kiristi. Partıanyń aımaqtardaǵy fılıaldarynda bilikti mamandar jas kásipkerlerge aqyl-keńes berip, tolaǵaı tájirıbelerimen bólisýde, - dep jazady Qamshy.kz Turkystan.kz - ke silteme jasap.
Apta basynda Shymkentte «Nur Otan» partıasynyń Ońtústik Qazaqstan oblystyq fılıalynyń Qoǵamdyq qabyldaý bólmesi kásipkerlikti damytýǵa memlekettik qoldaý boıynsha qoǵamdyq qabyldaý uıymdastyrdy. Azamattardy «Nur Otan» partıasy oblystyq fılıalynyń basshylyǵy, oblystyq kásipkerlik jáne ónerkásip basqarmasy, «Damý» kásipkerlikti qoldaý qory» AQ fılıalynyń jáne ekinshi deńgeıdegi bank ókilderi qabyldady. İs-shara Memleket basshysynyń «Nurly Jol» joldaýynyń negizgi erejeleri men «100 naqty qadam» Ult josparyn júzege asyrý jáne túsindirý boıynsha uıymdastyrý jumystaryn júrgizý maqsatynda ótkizildi.
Qoǵamdyq qabyldaý barysynda óz bıznesin ashý, tirkeý, nesıe alý sharttary boıynsha kóptegen suraqtar qoıyldy. Azamattarǵa bıznesti damytý jáne kásipkerlikti qoldaý boıynsha memlekettik baǵdarlamalar aıasynda túsiniktemeler berildi. «Damý» qorynyń menedjeri Sabyrjan Isaev memleket tarapynan kásipkerlikti damytý boıynsha keshendi sharalar qolǵa alynǵanyn, al Ońtústik Qazaqstan oblysynyń bul baǵytta áleýeti úlken ekenin atap ótti.
«Búgingi tańda elimizde zańdar, kóptegen baǵdarlamalar bıznesti qoldaýǵa baǵyttalyp otyr. Biraq bul jóninde kópshilik bile bermeıdi. Biz jas kásipkerlerge olar úshin qolaıly jáne utymdy joldaryn tańdaýǵa kómek beremiz. Kásipker «Bıznestiń jol kartasy-2020» kásipkerlikti qoldaý baǵdarlamasyn iske asyrý aıasynda bankten alǵan nesıesiniń paıyzdyq mólsherlemesin sýbsıdıalaı alady. «Damý» qory nesıe syıaqysyn tóleý boıynsha shyǵyndar bóligin óteıdi. Odan bólek, eger kásipkerdiń kepilge qoıatyn qarjysy jetkiliksiz bolsa, qor óz kepilin usyna alady», – dedi S.Isaev.
Mamandar keńesine júgingen Shymkent qalasynyń turǵyny Álıa Temirbaıqyzy tigin sehyn ashqysy keledi eken. «Qazirgi tańda men mektepte muǵalim bolym jumys isteımin. Úsh balam, eki nemerem bar. Meniń bıznes-josparym qarapaıym, biraq tabysty. Jaqynda zeınetkerlikke shyǵamyn. Sondyqtan, nesıe alyp, dızaıner-modeler qyzymmen birlese tigin sehin ashý oıymda bar. Birinshiden, balalaryma tek qana jaqsy jáne sapaly kıim tigip bere alamyn. Ekinshiden, otbasylyq bıznes úı-ishime tabys alyp keledi. Úshinshiden, qazaqtyń ulttyq kıimderin tigý armanyma qol jetkizemin», – dep josparlarymen bólisti. «ATF» bankiniń menedjeri jáne «Damý» qorynyń ókilderi bolashaq kásipker hanymǵa áıel kásipkerligin mıkronesıelendirý baǵdarlamasynyń merzimi, sharttary jáne tıimdi mólsherlemeleri boıynsha keńes berdi. Sol kúni aksıa barysynda 72 azamat orta jáne shaǵyn bıznesti qoldaý boıynsha mamandarǵa tikeleı suraqtaryn qoıyp, qajetti aqparat pen keńester aldy.
Sondaı-aq, ótken aptada «Nur Otan» partıasynyń Shyǵys Qazaqstan oblystyq fılıalynda «Bıznestiń jol kartasy-2020» memlekettik baǵdarlamasy partıalyq jobasynyń iske asý barysyn qadaǵalaý maqsatynda qoǵamdyq qabyldaý ótti. Bul qabyldaýdyń jóni ádettegiden ózgerek boldy. Qabyldaýǵa jeke bas ótinishterin aıtyp kelgen azamattar qarasy men olarǵa jaýap bergen ókiletti organ qyzmetkerleri de kóp boldy. Jıynǵa «Damý» kásipkerlikti damytý qorynyń jáne ekinshi deńgeıli bankter ókilderi qatysty.
«Myqty bıznes – qýatty memleket» partıa baǵdarlamasynyń sharttary men iske asýyn qamtamasyz etý joldaryn memlekettik organdar men damý ınstıtýttary, shaǵyn jáne orta bıznes ókilderi qyzý talqylady. Sondaı-aq, kásipkerlerdi tómen paıyzdy nesıemen qamtamasyz etý, kepildik qoıý men nesıeleý merzimin uzartý týraly aıtyldy.
«Men «Damýdyń» arqasynda bıznesimdi edáýir damytyp otyrmyn. Kásipkerlerge memleket qoldaý kórsetip, jaǵdaı jasaǵandaryna alǵys aıtamyz. Búgin mine, partıa qabyrǵasynda bas qosyp aqyl-keńesterimizben bólisip, kásipkerlikti odan ári jandandyrý jóninde oı bólistik. Memleket bergen múmkindiktiń arqasynda aldaǵy ýaqytta bıznesimdi odan ári damytsam dep otyrmyn. Qazir meniń eki dárihanam bar. Aldaǵy ýaqytta olardyń sanyn onǵa jetkizsem degen tilektemin», – deıdi jeke kásipker Qarlyǵash Kamshataeva.
Jıyn qortyndysy boıynsha partıa tarapynan memlekettik organdarǵa birqatar tapsyrmalar berildi. Naqty aıtqanda, nesıe alýǵa aryz bergen azamattardyń bıznes-josparyn qatań qadaǵalaý júkteldi. Óıtkeni tıimsiz bızneske nesıe alǵan azamattardyń aldaǵy ýaqytta qarajatty memleketke qaıtarýy qıyndyq týdyrýy múmkin.
«Nur Otan» partıasy Ońtústik Qazaqstan oblysy Kentaý qalalyq fılıalynyń uıymdastyrýymen ótkizilgen qalalyq Qoǵamdyq keńes múshelerimen kezdesýdiń de basty maqsaty – «Bıznestiń jol kartasy-2020» baǵdarlamasy aıasynda jas kásipkerlerge qoldaý kórsetý.
Kentaý – Ońtústik Qazaqstan oblysyndaǵy 88 myń halqy bar monoqala. Qalada 3200 shaǵyn kásipkerlik, 300 sharýa qojalyǵy, 150 orta bıznes sýbektileri jumys isteıdi. Memlekettik baǵdarlama aıasynda 2016 jyly 10 adamǵa 25 mln teńge kóleminde shaǵyn jáne orta kásipkerlikti damytýǵa nesıe berilgen. Qazirgi tańda kásipkerlik palatasy tarapynan taǵy da 8 adamnyń qujattary qaralyp jatyr.
Osy máseleler tóńireginde uıymdastyrylǵan kezdesý barysynda memlekettik baǵdarlamany iske asyrýdy qamtamasyz etetin organdar jáne kásipkerler mektebi ókilderi «Bıznestiń jol kartasy-2020» baǵdarlamasynyń sharttary men iske asyrý tetikteri týraly aqparat berdi.
Qalalyq kásipkerler palatasynyń dırektory M.Sadýov bıznes-bastamalardy iske asyrý jáne jas kásipkerlerdi qoldaý boıynsha atqarylǵan jumystar, kezdesetin problemalar jaıly aıtyp ótti. Óz kezeginde qalalyq Qoǵamdyq keńes tóraǵasy I.Jumabev jas kásipkerlerge berilip otyrǵan múmkindikterge toqtalyp: «Baǵdarlama maqsatyna sáıkes qaladaǵy kásipkerliktiń turaqty jáne teńgerimdi ósýin qamtamasyz etý kerek. Sonymen qatar, bar jumys oryndaryn saqtaý jáne turaqty jumys isteıtin jańa jumys oryndaryn ashý kerek», – dedi.
Keleli kezdesýge qatysqan jas kásipkerler kókeıdegi suraqtaryna tushymdy jaýaptar alyp, óz kásipterin atalǵan baǵdarlama aıasynda qaıta jandandyrýǵa bolatyndyǵyna kóz jetkizdi.
