QR Ulttyq qaýipsizdik komıteti tóraǵasynyń orynbasary Nurǵalı Belisbekovtyń aıtýynsha, sońǵy jyldary san alýan terorıstik aksıalardyń aldyn alý sharalary atqarylyp, júzdegen adamnyń xalyqaralyq lańkestik uıymdaryna qosylýyna jol berilmedi. Degenmen, Sırıadaǵy áskerı qaqtyǵystarǵa qatysyp jatqan Qazaqstan azamattary bar. Búginde olardyń arasynda radıkaldy kózqarasqa boı aldyrǵan adamdar az emes. Áskerı daıyndyǵy da joǵary. Sondyqtan ondaı azamattar elge qaıtip kelgennen keıin terorıstik akt jasaýy ábden múmkin, - dep habarlaıdy Qamshy.kz.

Ulttyq qaýipsizdik komıtetiniń málimetine sáıkes, sońǵy bes jyldyń ishinde san alýan maqsattaǵy 64 terorıstik jáne ekstremıstik aksıalardyń joly kesildi. Al aǵymdaǵy jyly ondaı 9 áreket áshkerelendi.

«Aýǵanstan, Irak pen Sırıadaǵy áskerı qaqtyǵystar bastalǵaly beri xalyqaralyq terorıstik uıymdardyń belsendiligi arta tústi. Osy ýaqytqa deıin terorıstik lagerlerden 45 Qazaqstan azamaty deportasıalandy. Óz erkimen oralǵan adamdar da az emes. Jalpy, bes jyldyń ishinde 445 adam sottaldy. Jyl basynan beri 25 adamǵa qatysty úkim shyǵaryldy, taǵy 50 jýyq adam ýaqytsha qamaý ızolátorynda otyr», - deıdi N.Belisbekov "Qazirgi kezeńdegi ekstremızm men terorızmniń aldyn alý men jolyn kesýdiń zańnamalyq jáne ınstıtýsıonaldyq sharalary" taqyrybyndaǵy "dóńgelek ústel" otyrysy barysynda.

Onyń sózine qaraǵanda, búginde Sırıadaǵy áskerı qaqtyǵystarǵa qatysyp jatqan Qazaqstan azamattary az emes. Olardyń basym bóligi radıkaldy kózqarasta júr. Áskerı daıyndyqtary da joǵary. Sondyqtan dál osy azamattar elge qaıtip kelse, terorıstik aktiler qaıtalanýy ábden múmkin.

«Qazirgi kezde biz ondaı adamdardy ary ketse, 7 jylǵa sottaı alamyz. Bul - eń joǵary jaza. Sondyqtan osy máseleni retteý kerek dep sanaımyz»,-dep atap kórsetti N.Belisbekov.