1989 jyly qyrkúıektiń 22-kúni Qazaqstanda «Tilder týraly» zań qabyldanǵan bolatyn. Sol mereıli kún elimizdegi aıtýly meıram – Qazaqstan halqynyń tilderi kúni retinde jyl saıyn atap ótiledi. Merekege oraı dúısenbi kúni «Nur Otan» partıasy Qyzylorda oblystyq fılıalyna qarasty «Temirjol» bastaýysh partıa uıymynyń uıymdastyrýymen «Ult birligi – el turaqtylyǵy» atty ártúrli etnos ókilderimen birlesken dóńgelek ústel ótti, - dep jazady Qamshy.kz Turkystan.kz - ke silteme jasap.
İs-sharaǵa bastaýysh partıa uıymdarynyń jetekshileri, Saıası keńes músheleri, bólimshege qarasty ózge ult ókilderi qatysty. Jıyn barysynda tehnıkalyq kitaphana qyzmetkerleri «Til – rýhanı mádenıettiń negizi» atty kitap kórmesin kópshilik nazaryna usynyp, kelgen qonaqtarǵa bıblıo­­-grafıalyq sholý jasady.
Alǵash bolyp sóz alǵan «Temirjol» bastaýysh partıa uıymy tóraǵasynyń birinshi orynbasary Bazara Tanbaeva jıylǵandardy «Qazaqstan halqynyń tilderi kúni» merekesimen quttyqtady. Sonan soń Elbasy, partıa Tóraǵasy Nursultan Ábishuly Nazarbaevtyń Qazaqstan halqyna arnaǵan Joldaýynda aıtylǵandaı, Qazaqstan búkil álemde halqy úsh tildi paıdalanatyn mádenıetti el retinde tanylýǵa tıistigin jáne memlekettik tildi meńgerý – barshamyzdyń mindetimiz ekenin atap ótti. «Búgingi kezdesýdiń maqsaty – Qazaqstanda turyp jatqan túrli etnos ókilderiniń qazaq ultyna degen syılastyǵy men ulttyq qarym-qatynasty nyǵaıtý», – dedi Bazara Tanbaeva.
Kezdesý barysynda jıylǵandar eldegi birlik pen turaqtylyq baǵytynda baıandamalar jasap, ózara pikir alysty. Jastar jaǵy elimiz úshin úsh tuǵyrly til saıasatynyń mańyzdylyǵyn sóz etse, aǵa býyn ókilderi tilimizdiń mártebesin kóterý, onyń shubarlanýyn boldyrmaý, el bolashaǵy qazaq tilinde ekendigi jóninde maǵynaly oılaryn ortaǵa saldy.
Al, ózge ult ókilderinen quralǵan mamandar eki tildi bilýimiz sol eldiń mádenıetin túsinýge yqpal etý ekenin jetkizdi. Odan ári ár ulttyń ókilderi óz ana tilinen bólek qazaq tilin qalaı meńgergeni týraly áńgimelep, jeke tájirıbelerimen bólisti. «Vagon servıs» mekemesi tehnıkalyq jolaýshylar parkiniń aǵash ustasy Aleksandr Vorobev: «Negizi adam balasynyń baqytty bolýy eki nársege baılanysty. Biri – alǵan jaryńnyń jaqsy bolýy bolsa, ekinshisi – mamandyǵyńdy adaspaı tabý. Osy eki baqyttyń da kiltin tabýyma qazaq tili sebepker boldy. Men bar baqytymdy qazaq tilinen taptym desem bolady. Sondyqtan qazaq tiline de, maǵan tildi úıretken qazaq halqyna da basymdy ıip, alǵysymdy aıtamyn. Qazaqy ortada óstim, qazaqtyń qyzyna úılendim. Balalarymnyń esimderi Aman, Esen, Beken, Dıas. Men qazaq elinde týǵanyma qýanamyn, qazaq tilin qurmetteımin», – dedi.
Basqosýǵa qatysqan qazaq, orys, ózbek, ýkraın ultynyń ókilderi óz ana tilderinde óleń joldaryn oqyp, bir-birine merekelik kóńil-kúı syılaǵany qandaı jarasymdy! Ulttyń birligin nyǵaıtyp, el turaqtylyǵyn bekite túsetin osyndaı jıyndardyń mańyzy qashanda zor.