Aldaǵy ýaqytta «Nur Otan» partıasynyń kadrlyq qoryn qalyptastyrý jumysy júzege asady. Bul týraly jaqynda Ortalyq apparatyń baspasóz alańynda partıanyń hatshysy Natalá Godýnova málim etti. Onyń aıtýynsha, bul bastama saılanbaly jáne partıalyq laýazymdarǵa joǵary kásibı kadrlardy usynýdyń júıeli prosedýrasy bolmaqshy. Kadrlyq rezerv eki deńgeıde – respýblıkalyq jáne aımaqtyq deńgeılerde bekitiledi. Respýblıkalyq rezervtiń negizi – aımaqtyq rezervtegiler. Oǵan ár aımaqtan úsh adamǵa deıin tirkele alady. Al aımaqtyq partıalyq kadrlyq rezervke ený úshin kandıdattar 3 satyly irikteý júıesinen ótýi qajet. Júıe konkýrstyq prosedýralar men quziretterin baǵalaýdan turady. Kandıdattardyń árqaısysy kásibı, partıalyq jáne jeke sıpattary boıynsha keshendi tekserýden ótedi, - dep jazady Qamshy.kz Turkystan.kz - ke silteme jasap.
Mysaly, partıa músheligi boıynsha ótili, jumys ótili, bilimi, partıalyq qyzmettegi sińirgen eńbegi boıynsha talaptar bar. Atalǵan talaptar aýdan-oblys-respýblıka boıynsha úsh topqa bólinip, soǵan saı júrgizilmek. Tek qylmystyq jáne ákimshilik jaýapkershilikke tartylmaýy, sybaılas jemqorlyqpen qatysynyń bolmaýy sondaı-aq, partıalyq jazalarynyń bolmaýy jónindegi talaptar ár deńgeı úshin mindetti bolyp otyr.
Partıalyq kadrlyq rezervti qalyptastyrý úsh aı boıy kezeń-kezeńmen ótedi dep josparlanǵan. Aldymen, partıalyq kadrlyq rezervti qalyptastyrý týraly habarlaý, sodan soń baryp partıanyń aımaqtyq jáne aýmaqtyq fılıaldarynyń qujattardy qabyldaýy jáne qaraýy, rezervke engiziletin kandıdattardy tirkeý, kandıdattardy bastaýysh partıa uıymdarynyń (BPU) jınalystarynda usyný, kandıdattardy testileý jáne suhbattasý kózdelgen. Aıta keterligi, testileý partıanyń aımaqtyq fılıaldarynyń oryn-jaılarynda ótedi. Testileýden ótken kandıdattar suhbattasýǵa jiberiledi. Suhbattasýdy partıanyń aımaqtyq fılıalynda komısıa ótkizedi. Sońynda, rezervtegilerdiń tizimderin tıisti aýdannyń, qala jáne oblystyń Saıası keńesiniń Búrolarynda bekitý qarastyrylǵan. Tizimge engenderdi bekitkennen keıin partıalyq kadrlyq rezervti damytý jumysy júrgiziletin bolady.
Kandıdattyń rezervte bolý merzimi 5 jyldy quraıdy, tıisti deńgeıde kandıdattardyń 50 paıyzy ilgeriletilgen jaǵdaıda jańartý júzege asyrylmaq.
Sondaı-aq, partıanyń Ortalyq apparatynda jáne aımaqtyq, aýmaqtyq fılıaldarynyń apparattarynda (basshylyqtan basqa) bos laýazymdyq oryndarǵa baıqaý negizinde qabyldaý júzege asyrylady.
Partıalyq kadrlyq rezervke alý, baıqaý ótkizý týraly habarlandyrý, merzimi jáne bos laýazymdarǵa qoıylatyn biliktilik talaptary «Aıqyn», «Lıter» respýblıkalyq gazetterinde, sondaı-aq partıanyń www.nurotan.kz veb-saıtynda jarıalandy.
̶ Partıa kadrlyq rezerv quryp, partıa apparatynda jumys isteıtin, aýdandyq, qalalyq, oblystyq máslıhattar men Májiliske usynatyn myqty mamandardy irikteıdi, ̶ dep atap ótti N.Godýnova. Aıta keterligi, kadrlyq rezerv tájirıbeli partıa múshelerinen, bastaýysh partıa uıymdarynyń músheleri men belsendi jastardan, sondaı-aq partıa jaqtastary qatarynan jasaqtalmaq. Al kadrlyq rezerv respýblıkalyq jáne aımaqtyq deńgeıde bekitiledi.
̶ Tańdap alý barysy 3 kezeńnen turady. Birinshi, bastaýysh partıa uıymdarynyń jınalysynda úmitkerler usynylady. Ekinshiden, saıası mektep menedjmentinde qashyqtyqtan testileý júrgiziledi. Iaǵnı, munda Konstıtýsıa, partıa jarǵylary men doktrınalary, saılaýaldy jáne jemqorlyqqa qarsy baǵdarlama, partıa músheleriniń etıka kodeksi boıynsha bilimderi tekseriledi. Ári qaraı suhbattasýǵa ótý úshin joǵaryda atalǵan qujattardyń árqaısysynan 12 suraqtyń kem degende 8-ne durys jaýap berýi tıis. Qazirgi ýaqytta aımaqtyq rezerv qalyptastyrylyp jatyr. Kandıdattar kelesi kvota boıynsha irikteledi: ár aýdannan – 10, qaladan – 12, oblys ortalyqtarynan – 25 kandıdat iriktelinip alynbaq, – dedi partıa hatshysy.
Partıa hatshysynyń aqparatyna súıensek, kadrlyq rezerv shamamen úsh myń adamnan quralmaq. Synaqtan súrinbeı ótken úmitkerlerdiń biliktiligin arttyrý da basty nazarda. «Nur Otan» partıasy ortalyq apparaty basshysynyń orynbasary Aıdos Zıadın:
̶ Partıa alǵash ret kadrlyq rezervti jasaqtaý jumysyna kiristi. Jyldyń sońyna deıin aımaqtyq deńgeıdi bitirýdi josparlap otyrmyz. Aımaqtyq kadrlyq rezerv jasaqtalǵannan keıin respýblıkalyq deńgeıde, Ortalyq apparatta árbir úmitkerdiń jumysyn tıimdi paıdalaný maqsatynda ártúrli semınarlar men trenıńter ótkizýdi qarastyrýdamyz. Ony óz deıgeıinde josparǵa sáıkes júzege asyratyn bolamyz, ̶ dedi.
Respýblıkalyq qor keler jyldyń sońynda qalyptasady. Onyń negizgi bóligin ár óńirden aımaqtyq qorǵa engender quraıtyn bolady.
Erkejan JUMATAI
Astana qalasy
