Múmkindigi shekteýli jandar qoǵamnyń aıryqsha qamqorlyǵyna, qoldaýyna muqtaj. Olardyń óz qatarlastary sekildi tolyqqandy tirshilik qurýy úshin áleýmettik turǵyda memleket tarapynan barlyq múmkindikter qarastyrylýda. Úkimettiń osy baǵyttaǵy bastamalaryn basshylyqqa alatyn «Nur Otan» da múmkindigi shekteýli jandardyń máselesin basty nazarda ustap, múgedek sábıler men jasóspirimderdiń kúndelikti ómirde ózderin jaqsy sezinýi úshin qoǵamdyq uıymdarmen birlese túrli is-sharalar uıymdastyryp keledi.
Ókinishke qaraı, elimizde ártúrli áleýmettik, ekologıalyq sebepterdiń saldarynan týa bitti múgedektikke ushyraǵan sábılerdiń qatary az emes. Statısıkalyq málimetterge súıensek, bir ǵana Almaty qalasynyń ózinde 3 902 múmkindigi shekteýli bala turady eken. Belgili pedagog-psıholog Samal Shaıahmetovanyń aıtýynsha, bul kontıngentke jatatyn balalardyń jany názik, kóńilderi erekshe sezimtal keledi. «Olardyń jeke ǵumyr keshetin ózindik álemi bolady. Tipti kórshi turatyn jaqyn adamdar da dál qasynda sondaı tirshilik ıesi júrgenin bilmeýi múmkin. Sondyqtan áleýmettik jaǵynan qamqorlyq jasaıtyn memlekettik organdarmen birge búkil qoǵam bolyp, osynaý kishkentaı adamdarǵa erekshe iltıpat kórsetkeni durys dep sanaımyn», – deıdi maman.
Mamandardyń nusqaýyn basshylyqqa alǵan partıanyń Almaty qalalyq fılıaly qala kúni qarsańynda demeýshi kásipkerlermen birlese otyryp, bir top múmkindigi shekteýli balalardy ásem Kóktebege qydyrtyp qaıtty. Balalardy taý bókterinde jaıylǵan aq dastarqan jáne túrli syılyqtar kútip turdy. «Bizdiń partıa belsendileri balalardy Alataýdyń eń ádemi jeriniń biri Kóktebege shyǵaryp, tabıǵat aıasynda dem aldyryp qana qoımaı, sol arqyly izgilikti is jasady. Búldirshinderge tátti kámpıtter, jemis pen sýsyndar úlestirip, eń bastysy úlken qýanysh syıladyq. Búgingi is-sharanyń mańyzy osynda», – deıdi «Nur Otan» partıasy Medeý aýdandyq fılıaly tóraǵasynyń birinshi orynbasary Arman Halbekov.
Shynynda da, altyn kúzdiń shýaqty kúninde balalardyń júzindegi alaý nur men ata-analardyń rızashylyq sezimi baıqalyp tur edi. Osy áserli saıahatty uıymdastyrýshylarǵa Rahat Sabırov ata-analardyń atynan alǵysyn bildirdi.
Partıanyń Soltústik Qazaqstan oblystyq fılıaly da kemtar jandardyń qoǵamdyq oryndarda erkin júrip-turýyna múmkindik beretin jaǵdaılardyń jasalýyna basa mán beredi. Ótken aptada múmkindigi shekteýli azamattardyń beıimdelý máseleleri boıynsha arnaıy jumys toby birqatar nysandarǵa qoǵamdyq baqylaý júrgizdi. Atap aıtqanda, oblystyń Aıyrtaý aýdanyndaǵy birqatar mekeme men uıymdar tekserildi. Nátıjesinde barlyq nysanda abattandyrý jumystarynyń aıaqtalǵany belgili boldy.
«Bizdiń jumysymyzdyń maqsaty – múmkindigi shekteýli adamdar úshin ınfraqurylymnyń qoljetimdiligine monıtorıń júrgizý. Oǵan oblystyq uıymdar men mekemelerdiń ǵımarattarynda júrip-turý jáne qyzmet kórsetý úshin qanaǵattanarlyq jaǵdaı bolýyn baǵalaý kiredi. Birinshi kezekte áleýmettik mańyzy bar nysandarǵa kóńil bólinedi. Iaǵnı, memlekettik, medısınalyq mekemelerge jáne mádenıet úılerine», – dedi «Nur Otan» partıasynyń Aıyrtaý aýdandyq fılıaly tóraǵasynyń birinshi orynbasary Bolat Ahmetjanov.
Aýdanda aýyl okrýgteriniń jeti ákimshilik ǵımaraty qaraldy. Jumys toby músheleriniń pikirinshe, nysandar eń tómengi talaptarǵa sáıkes keledi: múmkindigi shekteýli jandardyń kedergisiz kirýleri úshin pandýstar, esik oıyqtaryn ornatý normalary saqtalǵan, tutqalar bar. Birinshi orynbasar aýdan basshylyǵy múmkindigi shekteýli jandardyń jaǵdaıyn jaqsartý úshin taǵy birneshe obektilerdi jetildirýdi josparlap otyrǵanyn aıtty. «Osy jyly biz ótken jyly anyqtalǵan barlyq kemshilikterdi joıdyq. Sonyń arqasynda áleýmettik ınfraqurylymnyń 21 ǵımaraty talapqa sáıkestendirildi. Búginde múmkindigi shekteýli jandar úshin beıimdelý nysandarynyń barlyǵy 100 paıyzǵa daıyn», – deıdi Bolat Ahmetjanov.
Aımaqta múmkindigi shekteýli jandardy beıimdeýge arnalǵan tehnologıalarmen 597 áleýmettik jáne kóliktik ınfraqurylym nysany jabdyqtalǵan. Jyl basynan beri jumys tobynyń músheleri 185 nysandy tekserdi. Nátıjesinde keıbir nysandarda birqatar kemshilikter bar ekeni anyqtaldy. Taıaý arada bul olqylyqtardyń orny toltyrylmaq.